زەينەتاقى جيناعىنان سالىق الىنا ما - ۇلتتىق ەكونوميكا مينيسترلىگىنىڭ جاۋابى

استانا. KAZINFORM - ءماجىلىس وتىرىسىندا ازاماتتاردىڭ جەتكىلىكتىلىك شەگىنەن اسقان زەينەتاقى جيناقتارىن پايدالانۋىنا بايلانىستى جەكە تابىس سالىعىنىڭ (ج ت س) تولەنۋى تۋرالى ماسەلە كوتەرىلدى.

قازىرگى قولدانىستاعى زاڭناماعا سايكەس، زەينەتاقى قورىنان الىنعان قاراجاتقا ج ت س سالىنادى. الايدا جاڭا سالىق كودەكسىنىڭ جوباسىندا بۇل سالىقتى الىپ تاستاۋ كوزدەلىپ وتىر.

«سالىق كودەكسى مەن وعان ىلەسپە قۇجاتتار اياسىندا زەينەتاقى قاراجاتىنا، ونىڭ ىشىندە ءبىرجولعى زەينەتاقى تولەمدەرىنە سالىناتىن ج ت س- تى الىپ تاستاۋ قاراستىرىلىپ وتىر. دەگەنمەن، كوپتەگەن ازاماتتار بۇعان دەيىن زەينەتاقى جيناعىنان الىنعان سوماعا ج ت س تولەپ قويعان. ال كەيبىر ازاماتتار سالىق تولەۋدى زەينەتكە شىققاننان كەيىنگە شەگەرگەن. سوندا بۇرىن تولەگەن سالىقتى قايتارۋ قاراستىرىلا ما؟» - دەپ سۇرادى ءماجىلىس دەپۋتاتى نۇرگۇل تاۋ.

سۇراققا ۇلتتىق ەكونوميكا ءبىرىنشى ۆيتسە-ءمينيسترى ازامات امرين جاۋاپ بەردى.

«سالىق تولەۋ مەرزىمىن كەيىنگە قالدىرعان ازاماتتار – ج ت س تولەۋدەن بوساتىلادى. ال سالىقتى بۇرىن تولەپ قويعاندار ءۇشىن - قاراجات قايتارىلمايدى»، - دەدى ۆيتسە-مينيستر.

ياعني، جاڭا زاڭ كۇشىنە ەنگەننەن كەيىن، سالىق تولەۋدى كەيىنگە قالدىرعاندار جەڭىلدىككە يە بولادى، ال بۇرىن سالىق تولەگەندەرگە اقشا قايتارىلمايدى.