زياندى جۇمىس ىستەگەن 37 مىڭ ادامعا 208 مىڭ تەڭگەدەن تولەم جاسالادى
كەلەسى جىلدان باستاپ ەڭبەككە قابىلەتتىلىكتەن جانە اسىراۋشىسىنان ايىرىلعان جاعدايدا بەرىلەتىن الەۋمەتتىك تولەم كوبەيەدى. ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نازگۇل ساعىندىقوۆا 55 جاسقا تولعاننان كەيىن ارناۋلى الەۋمەتتىك تولەمدى الاتىندار قايدا حابارلاسۋى كەرەك ەكەنىن ءتۇسىندىردى، دەپ حابارلايدى Kazinform.
وسى تولەمدى تاۋ-كەن، مەديتسينا، وڭدەۋ ونەركاسىبىندە، شاحتادا جۇمىس ىستەپ جۇرگەن ادامدار الادى.
«زياندى ەڭبەك جاعدايىندا جۇمىس ىستەيتىن ازاماتتار ەندى 55 جاسقا تولعان سوڭ، وسى ارناۋلى تولەمدى الادى. ول تولەمنىڭ مولشەرى 4 كوزدەن قۇرالادى. رەسپۋبليكالىق بيۋدجەتتەن 2 ەڭ تومەنگى كۇنكورىس دەڭگەيى مولشەرىندە، ودان كەيىن جۇمىس بەرۋشىنىڭ وزىنەن 1 ەڭ تومەنگى كۇنكورىس دەڭگەيىندە، سونداي-اق ءومىردى ساقتاندىرۋ كومپانياسىنان جانە ءبىرىڭعاي جيناقتاۋشى زەينەتاقى قورىنان باعىتتالادى. وسىنىڭ بارلىعىن قوسىپ، ءبىر ۋاقىتتا تولەنەدى»، - دەدى ن. ساعىندىقوۆا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
بۇل تۇرعىدا ول شاحتەرگە نەمەسە باسقا دا زياندى ەڭبەك جاعدايىندا جۇمىس ىستەگەن ادامدارعا تولەنەتىن ارناۋلى الەۋمەتتىك تولەمنىڭ ورتاشا سوماسىن ايتتى.
«ورتاشا سوماسى 208 مىڭ تەڭگە بولادى. وزدەرىڭىزگە ءمالىم، رەسپۋبليكالىق بيۋدجەت تۋرالى زاڭ قابىلداندى. سول زاڭدا ەڭ تومەنگى كۇنكورىس دەڭگەيى 43 مىڭ تەڭگە دەڭگەيىندە بەكىتىلدى. ياعني رەسپۋبليكالىق بيۋدجەتتەن 86 مىڭ تەڭگە، جۇمىس بەرۋشىدەن 43 مىڭ تەڭگە بولىنەدى.
تاعى 43 مىڭ تەڭگەنى ءومىردى ساقتاندىرۋ كومپانياسى تولەيدى. سونداي-اق ورتاشا ەسەپپەن 35 مىڭ تەڭگە زەينەتاقى قورىنان اۋدارىلادى. كەلەر جىلى 1-قاڭتاردان باستاپ 37 مىڭ ادام وسى تولەمدى الادى»، - دەدى ۆيتسە-مينيستر.
بۇل تولەمدى زياندى جۇمىستاردا ىستەيتىن ازاماتتار 55 جاسقا تولعاندا، سونداي-اق كەمىندە 84 اي مىندەتتى كاسىپتىك زەينەتاقى جارنالارى تولەنگەن بولسا، جۇمىسىنان كەتكەندە نەمەسە باسقا جەڭىل قىزمەتكە اۋىسقان كەزدە الادى. ارنايى الەۋمەتتىك تولەم زەينەتكەرلىك جاسقا تولعانعا دەيىن ىسكە اسىرىلادى.
نازگۇل ساعىندىقوۆانىڭ سوزىنە قاراعاندا، بۇل جاردەماقىنى الۋ ءۇشىن قىزمەتكەرلەر جۇمىس ورنى بويىنشا كادر بولىمىنە حابارلاسىپ، ءتيىستى ءوتىنىش جازۋى قاجەت. بۇل رەتتە شاحتەر زياندى ەڭبەك جاعدايىنداعى جۇمىسىن توقتاتانىن جانە كەز كەلگەن باسقا جۇمىسقا اۋىساتىنىن مادىمدەيدى. وسى ءوتىنىش ەڭبەك مينيسترلىگىنىڭ جۇيەسىنە اۆتوماتتى تۇردە جىبەرىلىپ، بۇل ادامعا ارناۋلى الەۋمەتتىك تولەم بەكىتىلەدى.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق بىرلەستىكتەر جانە ەڭبەك جاعدايلارى زياندى جۇمىستاردا ىستەيتىن ادامداردى الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.
