زيالى قاۋىم وكىلدەرى مادەني مۇرانى ساقتاۋ مەن ۇلتتىق قۇندىلىقتاردى دارىپتەدى
استانا. KAZINFORM - زيالى قاۋىم وكىلدەرى «ادىلەت» پارتياسىنىڭ الاڭىندا ۇلتتىق مادەنيەتتى دامىتۋ ماسەلەلەرىن تالقىلادى.
تاريحي ورىندارعا ۆيرتۋالدى ەكسكۋرسيا ۇيىمداستىرۋ، بالالار شىعارماشىلىعىن قولداۋ، اۋىل تەاترلارىن دامىتۋ جانە ۇلتتىق داستۇرلەردى دارىپتەۋ. وسى جانە وزگە دە ۇسىنىستار «ادىلەت» پارتياسى جانىنداعى «Miras» رەسپۋبليكالىق كەڭەسىنىڭ العاشقى وتىرىسىندا ايتىلدى. قاتىسۋشىلار قازاقستاننىڭ مادەني مۇراسىن ساقتاۋ جانە پرەزيدەنت جولداۋىندا بەلگىلەنگەن مىندەتتەر اياسىندا قانداي باستامالاردى دامىتۋ قاجەت ەكەنىن تالقىلادى.
جيىنعا «ادىلەت» پارتياسىنىڭ قۇرىلتاي دەپۋتاتتارى، قازاقستان حالىق كەڭەسىنىڭ مۇشەلەرى، شىعارماشىلىق زيالى قاۋىم، مەملەكەتتىك ورگاندار مەن وڭىرلىك فيليالداردىڭ وكىلدەرى قاتىستى.
وتىرىستى اشقان «ادىلەت» پارتياسى ءتوراعاسىنىڭ ورىنباسارى ەرجان جىلقىبايەۆ ەل دامۋى تەك ەكونوميكالىق وزگەرىستەرمەن، قۇرىلىس جۇمىستارىمەن جانە جاڭا تەحنولوگيالاردى ەنگىزۋمەن شەكتەلمەيتىنىن اتاپ ءوتتى. بۇل ۇدەرىستە ءبىلىم، مادەنيەت، ۇلتتىق قۇندىلىقتار مەن ازاماتتاردىڭ قوعام الدىنداعى جاۋاپكەرشىلىگى دە ماڭىزدى ءرول اتقارادى.
«ەلدىڭ دامۋى تەك ەكونوميكالىق كورسەتكىشتەرمەن ولشەنبەيدى. قوعامنىڭ وي-ساناسى، ءوزارا قۇرمەت پەن ازاماتتىق جاۋاپكەرشىلىگى دە اسا ماڭىزدى. سوندىقتان ەكونوميكا مەن رۋحانيات قاتار دامۋى قاجەت. بۇل جولدا كىتاپ وقۋ مادەنيەتىن دامىتۋعا، قازاق ءتىلىنىڭ قولدانىس اياسىن كەڭەيتۋگە، تاريحي مۇرانى ساقتاۋعا، وتاندىق ادەبيەت پەن ونەردى قولداۋعا ەرەكشە ءمان بەرەمىز»، - دەدى ەرجان جىلقىبايەۆ.
ونىڭ ايتۋىنشا، مادەنيەت پەن قوعامعا قاتىستى باستامالار ءار ءوڭىردىڭ ەرەكشەلىگىن ەسكەرۋى ءتيىس. وسىعان بايلانىستى پارتيانىڭ وڭىرلىك فيليالدارى جانىنان مادەني مۇرانى ساقتاۋ جانە جەرگىلىكتى ماسەلەلەردى تالقىلاۋمەن اينالىساتىن «Miras» كەڭەستەرىن قۇرۋ جوسپارلانىپ وتىر. سونىمەن قاتار رەسپۋبليكالىق كەڭەستىڭ كوشپەلى وتىرىستارىن وڭىرلەردە وتكىزۋ ۇسىنىلدى. بۇل زيالى قاۋىم، قوعام جانە مەملەكەتتىك ورگاندار وكىلدەرىنىڭ مادەنيەت پەن ءبىلىمدى دامىتۋ ماسەلەلەرىن بىرلەسىپ تالقىلاۋىنا مۇمكىندىك بەرەدى.
«Miras» كەڭەسىنىڭ ءتوراعاسى، قۇرىلتاي دەپۋتاتى جاناربەك ءاشىمجان جاڭا الاڭ قوعام ءۇشىن ماڭىزدى ماسەلەلەردى اشىق تالقىلاپ، ناقتى ۇسىنىستار ازىرلەيتىن ورىنعا اينالۋى ءتيىس ەكەنىن اتاپ ءوتتى.
«كەڭەس وتىرىستارىنىڭ باستى قۇندىلىعى - ەركىن پىكىر الماسىپ، قوعامداعى وزەكتى ماسەلەلەردى اشىق تالقىلاۋعا مۇمكىندىك بەرۋىندە. اسىرەسە، رۋحانيات سالاسىندا قوردالانعان ماسەلەلەرگە جاڭاشا كوزقاراسپەن قاراپ، ولاردى شەشۋدىڭ ناقتى جولدارىن ءتيىستى مەملەكەتتىك ورگاندارمەن، قوعاممەن، كەڭەس مۇشەلەرىمەن بىرگە جۇزەگە اسىرامىز» ، - دەدى جاناربەك ءاشىمجان.
كەڭەس ءتوراعاسىنىڭ ورىنباسارى، قۇرىلتاي دەپۋتاتى جارقىنبەك امانتاي ۇلى مادەنيەت پەن ءبىلىمنىڭ ادامي كاپيتالدى دامىتۋداعى رولىنە توقتالدى. ونىڭ ايتۋىنشا، قازاقستاننىڭ ۇزاقمەرزىمدى دامۋى ەكونوميكالىق كورسەتكىشتەر مەن تەحنولوگيالىق جەتىستىكتەرگە عانا ەمەس، حالىقتىڭ ءبىلىم دەڭگەيىنە، مادەنيەتى مەن قوعامدىق ساناسىنا دا بايلانىستى.
قازاقستان حالىق كەڭەسىنىڭ مۇشەسى نۇرتورە ءجۇسىپ اۋقىمدى وزگەرىستەر كەزەڭىندە ۇلتتىق بولمىستى ساقتاۋدىڭ ماڭىزىن اتاپ ءوتتى. ول ەلدىڭ بولاشاعىن تالقىلاعاندا قازاق تىلىنە، ادەبيەتكە، ونەرگە، سالت-ءداستۇر مەن تاريحي مۇراعا ەرەكشە كوڭىل ءبولۋ قاجەت ەكەنىن ايتتى. ونىڭ پىكىرىنشە، قازىرگى قوعام مادەنيەتىنىڭ نەگىزىن ءۇش قاعيدات - زاڭ، ءتارتىپ جانە ەڭبەك قۇراۋى ءتيىس. سونداي-اق ول قازاقستاننىڭ ۇلتتىق قۇندىلىقتارىنىڭ ءبىرىڭعاي جۇيەسىن ازىرلەۋدى ۇسىندى.
«رۋحاني قۇندىلىقتار، ادەبيەت، مادەنيەت، ونەر، ساۋلەت - وسىنىڭ بارلىعى كۇن تارتىبىنەن تۇسپەۋى كەرەك. اسىرەسە، قوعامدىق مادەنيەت قالىپتاستىرۋ ماسەلەسىنە كەلەتىن بولساق، بۇل جەردە زاڭ، ءتارتىپ، ەڭبەك - وسى ءۇش تاعان نەگىزگە الىنۋى كەرەك»، - دەدى نۇرتورە ءجۇسىپ.
وتىرىسقا قاتىسۋشىلار ءبىرقاتار ناقتى ۇسىنىس تا ايتتى. اقىن وڭايگۇل تۇرجان قازاقستاننىڭ تاريحي ورىندارىنا ۆيرتۋالدى ەكسكۋرسيالار ۇيىمداستىرۋ باستاماسىن كوتەردى. بۇل زاماناۋي تەحنولوگيالار ارقىلى تۇرعىنداردى، اسىرەسە جاستاردى ەلىمىزدىڭ مادەني مۇراسىمەن تانىستىرۋعا مۇمكىندىك بەرەدى.
قۇرىلتاي دەپۋتاتى داۋلەت كارىبەك بالالاردىڭ شىعارماشىلىق جوبالارىن قولداۋعا كوبىرەك كوڭىل ءبولۋدى ۇسىندى. ءبورىحان نۇرمۇحامەدوۆ قوعامدىق ساناداعى وزگەرىستەردى تەرەڭىرەك زەردەلەۋ ءۇشىن اۋقىمدى الەۋمەتتانۋلىق زەرتتەۋ جۇرگىزۋ قاجەتتىگىن ايتتى.
قازاقستان حالىق كەڭەسىنىڭ مۇشەسى، اقىن امانجول ءالتاي اۋىلدىق جەرلەردەگى حالىق تەاترلارىنىڭ جۇمىسىن قايتا جانداندىرىپ، دامىتۋدى ۇسىندى. ال جازۋشى، دراماتۋرگ جابال ەرعالييەۆ وسكەلەڭ ۇرپاق تاربيەسى مەن ۇلتتىق ادامگەرشىلىك قۇندىلىقتاردى كەيىنگى بۋىنعا جەتكىزۋ ماسەلەلەرىن كوتەردى.
تالقىلاۋعا سالالىق ۇيىمداردىڭ وكىلدەرى دە قاتىستى. مادەنيەت جانە اقپارات ۆيتسە-ءمينيسترى رۋستام ءالي ۆەدومستۆونىڭ مادەنيەت پەن ونەر سالاسىنداعى جۇمىسى تۋرالى باياندادى. ال «كرەاتيۆتى يندۋستريالاردى دامىتۋ قورى» كورپوراتيۆتىك قورىنىڭ باسقارما ءتوراعاسى ەرلان قانالىموۆ «كرەاتيۆتى ءوڭىر» جانە «ۇلتتىق قولونەر مەكتەبى» جوبالارىن تانىستىردى.
جيىن قورىتىندىسىندا قاتىسۋشىلار «Miras» كەڭەسىنىڭ الداعى جۇمىس باعىتتارىن ايقىندادى. ولاردىڭ قاتارىندا مادەني مۇرانى ساقتاۋ، قازاق ءتىلىن دامىتۋ، ادەبيەت پەن ونەردى قولداۋ، سونداي-اق مادەنيەت پەن قوعامدىق دامۋ ماسەلەلەرىن تالقىلاۋعا وڭىرلەردى كەڭىنەن تارتۋ بار.
