زورلىق-زومبىلىق جايلى جاڭا فيلم كورەرمەننىڭ جوعارى باعاسىن الدى
استانا. KAZINFORM -قازاقستاندىق رەجيسسەر رينات بالعابايەۆ «ب ۇ ۇ-ايەلدەر» قۇرىلىمىنىڭ قولداۋىمەن سەكسۋالدى زورلىق- زومبىلىق تۋرالى «گورگونا» اتتى جاڭا دەرەكتى فيلمىن ۇسىندى.
تۋىندى الەۋمەتتىك جەلىلەردە قوعامدىق رەزونانس تۋدىردى. 6-ناۋرىزدا حالىقارالىق ايەلدەر كۇنى قارساڭىندا YouTube پلاتفورماسىندا جارىققا شىققاننان بەرى كورسەتىلىمى ميلليوننان استى. فيلم گەندەرلىك زورلىق-زومبىلىقتى باستان كەشىرگەن ايەلدەردىڭ شىنايى وقيعالارىن باياندايدى. تۇسىرىلىمگە كەيىپكەرلەرمەن قاتار قازاقستاندا گەندەرلىك جانە تۇرمىستىق زورلىق-زومبىلىققا قارسى كۇرەس سالاسىندا ەڭبەكتەنىپ جۇرگەن ازاماتتار اتسالىسقان.
«بۇل فيلمدە ءبىز قازاقستانداعى سەكسۋالدىق زورلىق-زومبىلىق ماسەلەسىنىڭ اۋقىمىن كورسەتۋگە عانا ەمەس، زورلىق-زومبىلىق كورگەن ايەلدەرگە ءوز وقيعاسىن ايتۋعا مۇمكىندىك بەرۋگە تىرىستىق. سونداي- اق قوعامداعى الەۋمەتتىك نورمالاردى وزگەرتۋگە ۇلەس قوسۋدى كوزدەدىك. وكىنىشتىسى، قازىرگى ۋاقىتتا قوعامداعى نورمالار تۇسىنبەۋشىلىك پەن جابىرلەنۋشىنى ايىپتاۋعا باعىتتالعان. فيلم وسى ماسەلەگە بەي- جاي قارامايتىن ءاربىر ادامدى زورلىق- زومبىلىقتان زارداپ شەككەندەرگە قولداۋ كورسەتۋگە شاقىرادى»، - دەدى فيلمنىڭ اۆتورى ءارى رەجيسسەرى رينات بالعابايەۆ.
ب ۇ ۇ دەرەكتەرى بويىنشا جىل سايىن ءاربىر التىنشى قازاقستاندىق ايەل زورلىق- زومبىلىققا ۇشىرايدى. زارداپ شەككەندەر ديسكريميناتسيادان قورىققاندىقتان، الەمنىڭ باسقا ەلدەرىندەگى سياقتى قازاقستاندا دا گەندەرلىك زورلىق-زومبىلىق جاسىرىن قالادى.
«ءوز وقيعالارىن بولىسكەن كەيىپكەرلەر -زورلىق- زومبىلىق كورگەندەردى ءۇنسىز قالماۋعا جانە قوعامدى گەندەرلىك زورلىق-زومبىلىقتى جويۋ ءۇشىن بىرىگۋگە شابىتتاندىراتىن باتىل ايەلدەر. بۇل فيلم ايەلدەر قۇقىعى ءۇشىن كۇرەستە جانە زورلىق- زومبىلىقتىڭ بارلىق ءتۇرىن جويۋدا ماڭىزدى اقپاراتتىق-ناسيحاتتىق تۋىندى بولادى دەپ ۇمىتتەنەمىز»، - دەپ اتاپ ءوتتى قازاقستانداعى ب ۇ ۇ- ايەلدەر» قۇرىلىمىنىڭ كەڭسە باسشىسىنىڭ مىندەتىن اتقارۋشى دينا امريشيەۆا.
