زەلەنسكي رەسەيمەن كەلىسسوزگە كەلۋ شارتىن اتادى
استانا. KAZINFORM - ۋكراينا پرەزيدەنتى ۆلاديمير زەلەنسكي ۇلى بريتانيالىق ITV News ارناسىنا بەرگەن سۇحباتىندا رەسەيمەن كەلىسسوزدەرگە دايىن ەكەنىن، ءبىراق ءبىر ماڭىزدى شارتپەن كەلىسەتىنىن مالىمدەدى.
زەلەنسكيدىڭ سوزىنشە، ۋكراينا ا ق ش پەن ەۋروپانىڭ ۋادەلەرى سەنىمدى ەكەنىنە كوز جەتكىزۋى كەرەك، ال بۇل كيەۆكە قولداۋدىڭ جالعاساتىنىنا كەپىلدىك بەرمەك.
زەلەنسكي رەسەي پرەزيدەنتى ۆلاديمير پۋتينمەن تىكەلەي كەلىسسوزدەر مۇمكىندىگى تۋرالى سۇراققا جاۋاپ بەرىپ، ءوز ۇستانىمىن بىلايشا ءتۇسىندىردى.
«امەريكا مەن ەۋروپا ءبىزدى تاستاپ كەتپەيتىنىنە، بىزگە قولداۋ كورسەتىپ، قاۋىپسىزدىك كەپىلدىكتەرىن بەرەتىنىنە سەنىمدى بولسام، كەز كەلگەن فورماتتاعى كەلىسسوزدەرگە دايىن بولار ەدىم»، - دەدى ول.
ۋكراينا پرەزيدەنتى بەيبىتشىلىك كيەۆ ءۇشىن ماڭىزدى ەكەنىن، الايدا بۇعان وداقتاستار تاراپىنان ناقتى قادامدار قاجەت ەكەنىن ايتتى.
زەلەنسكي قاجەت جاعدايلار جاسالسا، رەسەيمەن قاقتىعىس 2025-جىلى اياقتالۋى مۇمكىن ەكەنىن جوققا شىعارمادى. ول ۋكراينالىقتار سوعىس بيىل اياقتالعانىن قالايتىنىن، سونداي-اق، بۇل پىكىردى ا ق ش- تىڭ بۇرىنعى پرەزيدەنتى دونالد ترامپ تا قولدايتىنىن ايتتى.
سونىمەن قاتار، زەلەنسكي جاقىن ارادا ەلدە سايلاۋ وتكىزۋدى قولدامايتىنىن مالىمدەدى. ونىڭ ايتۋىنشا، ۋكراينا حالقى سوعىس جاعدايىندا داۋىس بەرۋدى قولدامايدى.
«حالقىمىز سوعىس كەزىندە سايلاۋ وتكىزۋگە قارسى. ەگەر ءبىز اسكەري جاعدايدى توقتاتساق، ارميامىزدى جوعالتامىز. ال اسكەري قىزمەتكەرلەرسىز داۋىس بەرۋ ادىلەتسىز»، - دەدى ۆلاديمير زەلەنسكي.
بۇعان دەيىن نە بەلگىلى؟
ەسكە سالايىق، بۇعان دەيىن دە ۋكراينا پرەزيدەنتى ۆلاديمير زەلەنسكي رەسەي پرەزيدەنتى ۆلاديمير پۋتينمەن كەلىسسوز ۇستەلىنە وتىرۋعا دايىن ەكەنىن ايتتى. ونىڭ سوزىنشە، ۋكراينالىقتار ءۇشىن بەيبىتشىلىك ورناتۋدىڭ جالعىز سحەماسى وسى بولسا، بۇل قادامعا بارۋعا ءازىر.
«بۇل ۋكراينالىقتار ءۇشىن بەيبىتشىلىككە قول جەتكىزۋدىڭ جانە ادام ءولىمىن بولعىزباۋدىڭ جالعىز جولى بولسا، ارينە، ءبىز وعان بارامىز»، - دەگەن زەلەنسكي ۇلى بريتانيالىق جۋرناليست پيرس مورگانعا بەرگەن سۇحباتىندا.
ال پۋتين بۇعان دەيىن زەلەنسكيدى زاڭسىز پرەزيدەنت دەپ سانايتىنىن، ويتكەنى 2024-جىلعى مامىردا ونىڭ وكىلەتتىك مەرزىمى اياقتالعانىن، دەمەك بەيبىت كەلىسىمگە قول قويۋعا قۇقىعى جوق ەكەنىن ايتتى.
Massaget.kz
