پەزەشكيان: ا ق ش يرانمەن سوعىستى توقتاتۋ تۋرالى شەشىم قابىلداۋعا ءتيىس

يران پرەزيدەنتى ماسۋد پەزەشكيان تەگەراننىڭ اسكەري تەكەتىرەستى جالعاستىرۋعا نيەتى جوق ەكەنىن ايتىپ، سوعىستى توقتاتۋ تۋرالى شەشىم ۆاشينگتونعا بايلانىستى ەكەنىن مالىمدەدى.

بۇل تۋرالى ول 24-قىركۇيەكتە Fox News تەلەارناسىنا بەرگەن سۇحباتىندا ايتتى.

- ەگەر ماسەلەنى ديالوگ ارقىلى شەشۋگە مۇمكىندىك بولسا، ءبىر-بىرىمىزبەن سوعىسىپ، ادام ولىمىنە جول بەرمەۋىمىز كەرەك. الايدا ءيزرايلدىڭ ارانداتۋىنان كەيىن بۇل سوعىس بىزگە تاڭىلدى. ءبىز سوعىستى جالعاستىرۋعا مۇددەلى ەمەسپىز. ەندى ونى توقتاتۋدى قالاي ما، جوق پا - مۇنى امەريكانىڭ ءوزى شەشۋى كەرەك، - دەدى پەزەشكيان.

ول كەلىسىم حالىقارالىق قۇقىق تالاپتارىنا ساي بولىپ، تەگەراننىڭ زاڭدى مۇددەلەرى ەسكەرىلگەن جاعدايدا، يراننىڭ ا ق ش پرەزيدەنتى دونالد ترامپ اكىمشىلىگىمەن كەلىسىم جاساۋعا دايىن ەكەنىن راستادى.

پەزەشكياننىڭ ايتۋىنشا، تاراپتار بۇعان دەيىن كەلىسىمنىڭ نەگىزگى شارتتارىن ماقۇلداپ، ءوزارا تۇسىنىستىك تۋرالى مەموراندۋمعا قول قويعان. الايدا ونىڭ سوزىنشە، قۇجاتقا قول قويىلعاننان كەيىن ەكى اپتا وتكەن سوڭ ۋاعدالاستىقتار بۇزىلعان.

- ەگەر ا ق ش- تىڭ قازىرگى اكىمشىلىگى حالىقارالىق قۇقىق تالاپتارىن ساقتاي وتىرىپ، كەلىسىمگە كەلۋدى كوزدەسە، ءبىز دايىنبىز. ال ولاي بولماسا، ونىڭ ارالىق سايلاۋعا دەيىن نە ودان كەيىن جاسالعانىنىڭ ءبىز ءۇشىن قانداي ايىرماسى بار؟ - دەدى يران پرەزيدەنتى.

سونىمەن قاتار پەزەشكيان تەگەران ا ق ش- تىڭ قاراشاعا جوسپارلانعان كونگرەسس سايلاۋىنا دەيىن ۆاشينگتوننىڭ ءوزارا تۇسىنىستىك تۋرالى مەموراندۋمعا قايتا ورالعانىن قالايتىنىن ايتتى.

مەموراندۋم بەيبىت كەلىسسوزدەردى قايتا باستاۋعا جانە ورمۋز بۇعازىن اشۋعا نەگىز بولۋعا ءتيىس ەدى. ءبىراق ونىڭ قولدانىلۋ مەرزىمى تامىز ايىنىڭ ورتاسىندا اياقتالدى.

يران پرەزيدەنتى ا ق ش پەن يزرايلدىڭ سوققىلارىنان ەلدىڭ جوعارعى باسشىسى، يراندىق عالىمدار، اسكەري قولباسشىلار مەن مەملەكەتتىك قىزمەتكەرلەر قازا تاپقانىنا قاراماستان، تەگەران كەلىسىمگە كەلۋگە كۇش سالىپ جاتقانىن ايتتى.

پەزەشكيان يەمەندەگى حۋسيتتەر يران ۇكىمەتىنىڭ نۇسقاۋىمەن ارەكەت ەتەدى دەگەن پىكىردى دە جوققا شىعاردى. بۇعان دەيىن ا ق ش پەن يەمەننىڭ حالىقارالىق دەڭگەيدە مويىندالعان ۇكىمەتى تەگەراندى «انسار اللاح» قوزعالىسىنا اسكەري جانە ساياسي قولداۋ كورسەتىپ وتىر دەپ ايىپتاعان.

- حۋسيتتەر ءوز ارەكەتتەرى ءۇشىن وزدەرى جاۋاپ بەرەدى. ولار ءبىزدىڭ نۇسقاۋىمىزبەن ارەكەت ەتپەيدى. ءبىز ولارمەن ارالاسامىز، ءبىراق بىزدە تۇراقتى ءارى جۇيەلى قارىم-قاتىناس جوق، - دەدى ول.

پەزەشكياننىڭ بۇل مالىمدەمەسى نيۋ- يوركتە يران مەن اقش وكىلدەرى بىرنەشە ايدان كەيىن العاش رەت جاناما كەلىسسوز وتكىزگەن تۇستا ايتىلدى. تاراپتار قاتاردىڭ ارااعايىندىعىمەن حابار الماسقانىمەن، ناقتى كەلىسىمگە كەلگەنى تۋرالى اقپارات تاراعان جوق.