زاڭى - قاتال! سپورتشى تەمەكى شەككەنى ءۇشىن وليمپياداعا قاتىستىرىلمايتىن بولدى
استانا. قازاقپارات - سپورتتىق گيمناستيكادان جاپونيا قۇراماسىنىڭ كاپيتانى سەكو مياتا پاريجدەگى وليمپيادا ويىندارىنا قاتىسپايتىن بولدى. ول زاڭ مەن كوماندا ەرەجەسىن ەسكەرمەي تەمەكى شەككەنى ءۇشىن ۇلتتىق قۇرامادان شەتتەتىلدى.
Kyodo باسىلىمى حابارلاعانداي، 19 جاستاعى گيمناسشى موناكوداعى وقۋ-جاتتىعۋ كەزىندە تەمەكى شەگىپ ۇستالعان. كەلەر كۇنى كوماندانىڭ اشىق جاتتىعۋىنا قاتىسپاعان. كەيىننەن قۇرامادان شەتتەتىلىپ، ەلىنە قايتارىلعانى حابارلاندى.
جاپونيادا زاڭ بويىنشا 20 جاسقا تولماعاندارعا الكوگول ءىشۋ مەن تەمەكى شەگۋگە تىيىم سالىنعان. ال بۇل زاڭ ۇلتتىق قۇراما سپورتشىلارى وزگە ەلدە جۇرگەندە دە كۇشىندە بولادى.
سەكو مياتا 2022 -جىلى الەم چەمپيوناتىنا العاش رەت قاتىسىپ، بورەنەدەگى جاتتىعۋ بويىنشا قولا جۇلدەگەر اتانعان ەدى. سول جىلعى ازيا چەمپيوناتىندا سەكىرۋ جانە ەركىن جاتتىعۋلار بويىنشا كۇمىس الدى، كوماندالىق تۋرنيردە قولا جۇلدەگەر اتانعان ەدى.
