زاڭسىز ويىن بيزنەسىمەن، لۋدومانيامەن كۇرەسۋدىڭ كەشەندى جوسپارى ازىرلەنىپ جاتىر-ەرلان قارين
مەملەكەتتىك كەڭەسشى ەرلان قارين قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ قىزمەتىن قورىتىندىلادى، دەپ حابارلايدى Kazinform.
- قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەس ءۇشىن 2023 -جىل تابىستى بولدى. بۇل كەڭەس جاستارعا قاتىستى ءبىرقاتار ماڭىزدى ستراتەگيالىق قۇجاتتى ازىرلەۋگە اتسالىستى.
اتاپ ايتساق، مەملەكەتتىك جاستار ساياساتىنىڭ 2023 - 2029 -جىلدارعا ارنالعان تۇجىرىمداماسى دايىندالدى. بيىل وسى قۇجاتتى جۇزەگە اسىرۋ بارىسىندا جاس ازاماتتاردىڭ كاسىپكەرلىكپەن اينالىسۋىنا جول اشاتىن ماڭىزدى باستاما قولعا الىندى: جالپى سوماسى 26 ميلليارد تەڭگەنى قۇرايتىن 5,6 مىڭ بيزنەس جوبالارى ءۇشىن %2,5 مولشەرلەمەسىمەن جەڭىلدەتىلگەن نەسيە بەرىلەدى. كەلەسى جىلى جاستارعا ارنالعان جەڭىلدەتىلگەن تۇرعىن-ءۇي باعدارلاماسىن قولعا الۋ جوسپاردا بار.
كەڭەستىڭ تىكەلەي قاتىسۋىمەن ازىرلەنگەن تاعى ءبىر ماڭىزدى قۇجات - ناشاقورلىققا جانە ەسىرتكى بيزنەسىنە قارسى كۇرەستىڭ 2023 -2025 -جىلدارعا ارنالعان كەشەندى جوسپار. سينتەتيكالىق ەسىرتكىگە قارسى ءىس-قيمىلدىڭ ماڭىزدىلىعى العاش رەت كەڭەس الاڭىندا ايتىلعان ەدى. ەندى جوسپاردىڭ ورىندالۋى وسى قۇرىلىمنىڭ تۇراقتى باقىلاۋىندا بولادى، - دەپ جازدى ەرلان قارين Telegram ارناسىنداعى پاراقشاسىندا.
مەملەكەتتىك كەڭەسشى سونداي- اق كەڭەستىڭ مۇشەلەرى «قازاقستان جاستارى - 2023» اتتى ۇلتتىق باياندامانى ازىرلەۋگە ەلەۋلى ۇلەس قوسقانىن اتاپ ءوتتى.
— الداعى 2024-جىلى دا كەڭەس جاستارعا قاتىستى وزەكتى ماسەلەلەرمەن بەلسەنە اينالىسىپ، مەملەكەت باسشىسىنىڭ باستامالارىن جۇزەگە اسىرۋعا اتسالىسۋدى جالعاستىراتىن بولادى. ناقتى ايتقاندا، بۇگىندە كەڭەس لۋدومانيانىڭ تارالۋىنا جول بەرمەۋ ءىسىن مىقتاپ قولعا الدى. وسى ورايدا، ونىڭ مۇشەلەرىنىڭ ۇسىنىسىمەن قۇمار ويىن بيزنەسىنە قارسى ءىس-قيمىل جانە لۋدومانياعا قارسى كۇرەس جونىندە كەشەندى جوسپاردى ازىرلەۋ جۇمىسى باستالدى،- دەپ جازدى ول.
