زاڭسىز سىياقىنى قورقىتىپ الۋ دەرەكتەرى قاتاڭ باقىلاۋعا الىنادى
استانا. KAZINFORM - حالىققا قىزمەت كورسەتۋ ورتالىقتارى، اۋرۋحانالار قىزمەتكەرلەرىنىڭ سىياقىلاردى بوپسالاۋ دەرەكتەرى ءجيى كەزدەسەدى.

بۇل تۋرالى ءماجىلىستىڭ جالپى وتىرىسىندا سىبايلاس جەمقورلىققا قارسى ءىس- قيمىل ماسەلەلەرى بويىنشا زاڭ جوباسىن تالقىلاۋ كەزىندە ق ر سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ءبىرىنشى ورىنباسارى ۇلان سارقۇلوۆ ءمالىم ەتتى.
- مەملەكەتتىك ورگان، مەملەكەتتىك جانە مەملەكەتتىك ەمەس ۇيىم قىزمەتكەرىنىڭ زاڭسىز سىياقىنى قورقىتىپ الۋىنا بايلانىستى قىلمىستاردى انىقتاۋ جونىندەگى جۇمىستى جەتىلدىرۋ قاراستىرىلدى. تۇزەتۋلەر 2021 -جىلعى 1- قىركۇيەكتەگى مەملەكەت باسشىسىنىڭ جولداۋىندا ايتىلعان تۇرمىستىق سىبايلاس جەمقورلىقتى جويۋ جونىندەگى تاپسىرماسىن ورىنداۋعا باعىتتالعان. تاجىريبەگە سۇيەنسەك، حالىققا قىزمەت كورسەتۋ ورتالىقتارىنىڭ، اۋرۋحانالاردىڭ، جوعارى وقۋ ورىندارىنىڭ، بانك قىزمەتكەرلەرىنىڭ سىياقىلاردى بوپسالاۋ دەرەكتەرى ءجيى كەزدەسەدى، - دەدى ۇ. سارقۇلوۆ.
ونىڭ ايتۋىنشا، 2023 -جىلى سىبايلاس جەمقورلىققا قارسى قىزمەتتىڭ call-ورتالىعىنا 27 مىڭنان استام قوڭىراۋ شالۋ دەرەگى تىركەلدى. ونىڭ ىشىندە 2 مىڭعا جۋىق قوڭىراۋ eGov ماسەلەلەرى بويىنشا جانە حالىققا قىزمەت كورسەتۋ ورتالىقتارىنىڭ قىزمەتكەرلەرىنە شاعىمدارعا قاتىستى. 1,5 مىڭ ءوتىنىش مەديتسينالىق قىزمەت كورسەتۋ ماسەلەلەرى بويىنشا، 940 قوڭىراۋ ءبىلىم بەرۋ سالاسىنداعى شاعىمدار. اتالعان ۇيىمداردىڭ قىزمەتكەرلەرىنىڭ زاڭسىز سىياقى العانى ءۇشىن قىلمىستىق جاۋاپتىلىعى قىلمىستىق كودەكستىڭ قولدانىستاعى 247-بابى بويىنشا تۋىندايدى.
- ولار شەنەۋنىكتەر بولماسا دا، سايكەسىنشە سىبايلاس جەمقورلىق قىلمىستارىنىڭ سۋبەكتىلەرى ەمەس، ءبىراق سوعان قاراماستان، قوعام الدىندا بۇل ەل كولەمىندەگى سىبايلاس جەمقورلىق رەتىندە قابىلدانادى. بۇگىنگى كۇنى قىلمىستىق كودەكستىڭ 247 - بابىندا كوزدەلگەن قىلمىس ىشكى ىستەر ورگاندارىنىڭ ايرىقشا تەرگەۋلىگى سانالادى. قىلمىستىق كودەكستىڭ 247 - بابى بويىنشا ءىستى ءتيىمدى تەرگەپ- تەكسەرۋ ءۇشىن «پارا الۋ» بويىنشا جەدەل- ىزدەستىرۋ قىزمەتىنىڭ بارلىق ارسەنالى قولدانىلۋى ءتيىس. باسقاشا ولاردى انىقتاۋ قيىن، سوندىقتان حالىقتا جازاسىز قالۋ تۋرالى پىكىر قالىپتاسادى، - دەدى اگەنتتىك وكىلى.
وسى ورايدا زاڭ جوباسىندا سىياقىنىنى قورقىتىپ الۋ بەلگىلەرى بولعان كەزدە ارنايى جەدەل ءىس- شارالار وتكىزۋگە مۇمكىندىك بەرەتىن تۇزەتۋلەر ەنگىزۋ كوزدەلگەن.
- سونداي-اق، قىلمىستىق كودەكس سىياقىنى زاڭسىز بەرگەنى ءۇشىن جاۋاپكەرشىلىكتى كوزدەيتىن جاڭا 247-1-باپپەن تولىقتىرىلىپ وتىر. بۇل پاراقورلىققا ۇقساس، تەك الۋشىلاردى عانا ەمەس، سىياقىنى بەرۋشىلەردى دە جاۋاپقا تارتۋعا مۇمكىندىك بەرەدى. قىلمىستىق كودەكستىڭ 247-بابى ءۇشىنشى بولىگى ء(ىرى مولشەردە نەمەسە بوپسالاۋمەن سىياقى الۋ) جانە 247-1-بابىنىڭ ءۇشىنشى بولىگى بويىنشا ء(ىرى مولشەردە سىياقىنى بەرۋ) ىشكى ىستەر مينيسترلىگىمەن قاتار، سىبايلاس جەمقورلىققا قارسى قىزمەت ءۇشىن بالامالى تەرگەۋلىك ەنگىزىلەدى، - دەدى ۇلان سارقۇلوۆ.
بۇدان بۇرىن حابارلانعانداي، بۇل زاڭ جوباسى اياسىندا اۋىر جانە اسا اۋىر سىبايلاس جەمقورلىق قىلمىستار جاساعانى ءۇشىن سوتتالعانداردىڭ جاريا ءتىزىلىمى ەنگىزىلەدى.