زاڭسىز شىعارىلعان اكتيۆتەردىڭ جۇمىس توبى نەگە جاريا ەتىلمەيدى
ق ر پارلامەنتى ءماجىلىسىنىڭ دەپۋتاتى، «AMANAT» پارتياسى فراكسياسىنىڭ جەتەكشىسى ەلنۇر بەيسەنبايەۆ زاڭسىز شىعارىلعان اكتيۆتەردىڭ جۇمىس توبى نەگە جابىق تىزىممەن جاساقتالاتىنىن ءتۇسىندىردى، دەپ حابارلايدى Kazinform.
پارتيا وكىلى مۇندا كوميسسيا مۇشەلەرىنە قىسىم بولۋ قاۋپى بار ەكەنىن ايتتى.
«ەگەر كوميسسيا مۇشەلەرىن اشىق جاريالاپ ايتاتىن بولساق، بۇل رەتتە سىرتقا كاپيتالىن شىعارعانداردىڭ ەڭ الدىمەن قىلمىستىق توپ ەكەنىن ايتۋىمىز كەرەك. ءبىز، دەپۋتاتتار زاڭدى جازىپ بەردىك، وندا ءبارى انىق جازىلعان. ەندى پروكۋراتۋرا - سول زاڭدى ىسكە اسىراتىن ورگان، ءتۇسىندىرۋ جۇمىستارىن جۇرگىزۋ كەرەك. زاڭسىز اكتيۆ يەلەرى ءارتۇرلى قۇيتىرقى ارەكەتتەرگە بارۋى مۇمكىن. ويتكەنى وندا ميللياردتاعان قاراجات ءسوز بولىپ وتىر. سول سەبەپتى بۇل كوميسسيا جۇمىسى جابىق بولعانى جۇمىستى ىلگەرىلەتۋگە اناعۇرلىم كومەكتەسەدى»، - دەدى ە. بەيسەنبايەۆ Jibek joly تەلەارناسىنىڭ «ۋادە» باعدارلاماسىندا.
سونىمەن بىرگە، سپيكەر كومپانيالار ءتىزىلىمىنىڭ نەلىكتەن جاريالانبايتىنىن ايتىپ بەردى.
«بىرىنشىدەن، بۇل كومپانيانىڭ وزىنە قاۋىپ، ولاردى تىزىلىمگە قوسساق، تەكسەرە كەلە، قاراجاتىن زاڭ جۇزىندە تاپقانىن دالەلدەسە، كومپانيانىڭ قارجىلىق بەدەلىنە نۇقسان كەلەدى. بۇل مەملەكەتىمىزدىڭ قارجىلىق حال-احۋالىنىڭ تومەندەۋىنە اكەپ سوعادى. سوندىقتان رەەستردىڭ جابىق بولعانى دۇرىس. ال ەگەر راسىندا دا قانداي دا ءبىر ءىرى كومپانيادان زاڭسىز يەمدەنگەن اكتيۆ تابىلسا، قىلمىستىق ءىس قوزعالعان ساتتە-اق اقپارات بىردەن باسپا سوزدە جاريالانادى»، - دەدى ە. بەيسەنبايەۆ.
بۇعان دەيىن ە. بەيسەنبايەۆ سايلاۋدا ايقىن جەڭىسكە جەتكەن ساياسي پارتيانىڭ وكىلدەرى ۇكىمەت باسشىسىن ۇسىناتىنىن، قازىرگى ۇكىمەتكە جالپى كوڭىلى تولاتىنىن ايتقان ەدى.
