زاڭسىز اينالىمنان 3 توننادان استام ەسىرتكى تاركىلەندى - ۇ ق ك

استانا. KAZINFORM - «قارا نارىقتا» تاركىلەنگەن ەسىرتكىنىڭ قۇنى 36 ميلليارد تەڭگەدەن اسا باعالانادى، دەپ حابارلايدى ۇ ق ك باسپا ءسوز قىزمەتى.

2024 -جىلى ۇلتتىق قاۋىپسىزدىك كوميتەتى ەسىرتكىنىڭ زاڭسىز اينالىمىنا قارسى ءىس- قيمىل شەڭبەرىندە 31 حالىقارالىق جانە 27 وڭىرلىك جەتكىزۋ ارناسىن جويىپ، 32 جاسىرىن ەسىرتكى زەرتحاناسىنىڭ قىزمەتىن بەيتاراپتاندىردى.

- زاڭسىز اينالىمنان 3 توننادان استام ەسىرتكى جانە پسيحوتروپتىق زاتتار، 4,5 توننا كوكنار سابانى شيكىزاتى جانە «سينتەتيكا» جاساۋ ءۇشىن قولدانىلاتىن 18 توننا حيميالىق رەاگەنتتەر تاركىلەندى. «قارا نارىقتا» تاركىلەنگەن ەسىرتكىنىڭ قۇنى 36 ميلليارد تەڭگەدەن اسا باعالانادى. ەسىرتكى قىلمىستارىن جاساعانى ءۇشىن 164 ادام سوتتالدى. قازاقستان ارقىلى ەسىرتكىنى اكەلۋ جانە تاسىمالداۋ ارنالارىنىڭ جولىن كەسۋ بويىنشا شەت مەملەكەتتەردىڭ قۇزىرەتتى ورگاندارىمەن 25 حالىقارالىق وپەراتسيا جۇزەگە اسىرىلدى، - دەلىنگەن ۆەدومستۆو حابارلاماسىندا.

ەسىرتكىنىڭ زاڭسىز اينالىمىنا قارسى كۇرەس بويىنشا ءىس- شارالار جالعاسۋدا.

ايتا كەتەيىك، بۇعان دەيىن قىزىلوردا وبلىسىندا 20 ميلليون تەڭگەگە باعالانعان ەسىرتكىنى تاسىمالداعان ادام ۇستالعانىن حابارلادىق.