زاڭسىز اكتيۆتەردى قايتارۋ جونىندەگى كوميسسيا: مەملەكەت كىرىسىنە قوسىمشا 40 ميلليارد تەڭگە قايتارىلدى
استانا. KAZINFORM - بۇگىن قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆتىڭ توراعالىعىمەن زاڭسىز يەمدەنىلگەن اكتيۆتەردى مەملەكەتكە قايتارۋ جونىندەگى كوميسسيانىڭ كەزەكتى وتىرىسى ءوتتى، دەپ حابارلايدى ۇكىمەتتىڭ باسپا ءسوز قىزمەتى.
كوميسسيا جالپى كولەمى 40 ميلليارد تەڭگەدەن استام سوماعا زاڭسىز يەمدەنىلگەن اكتيۆتەردى مەملەكەتكە ەرىكتى تۇردە قايتارۋ جونىندەگى كەلىسىمدەردى ماقۇلدادى، ونىڭ 38 ميلليارد تەڭگەدەن استامى - اقشالاي قاراجات، سونداي-اق استاناداعى قۇنى 2 ميلليارد تەڭگە تۇراتىن بيزنەس-ورتالىق بار. قايتارىلعان قاراجات الەۋمەتتىك ماقساتتارعا، ونىڭ ىشىندە سۋ تاسقىنى سالدارىن جويۋعا باعىتتالادى.
بۇعان قوسا 7 ميلليارد تەڭگە سوماسىنا ينۆەستيتسيالىق كەلىسىمدەرگە قول قويۋ ماقۇلداندى، ونىڭ اياسىندا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» ق ر زاڭى قولدانىلاتىن تۇلعالار استانا جانە شىمكەنت قالالارىندا ەكى ينفراقۇرىلىم نىسانىن سالادى. اتالعان جوبالاردى ىسكە اسىرۋ جۇمىس ورىندارىن قۇرۋعا مۇمكىندىك بەرەدى جانە قوسىمشا سالىق تۇسىمدەرىن قامتاماسىز ەتەدى.
«اكتيۆتەردى قايتارۋ جۇمىستارى - بۇل مەملەكەت باسشىسىنىڭ الەۋمەتتىك ادىلەتتىلىكتى قالپىنا كەلتىرۋ جونىندەگى ساياساتىنىڭ تىكەلەي ىسكە اسىرىلۋى. بارلىق قايتارىلعان قاراجات قازاقستان حالقىنىڭ يگىلىگىنە جۇمسالادى»، - دەپ اتاپ ءوتتى ولجاس بەكتەنوۆ.
