زاڭداردىڭ قازاقشا نۇسقاسى تۇسىنىكسىز بولسا، كەرى قايتارامىز - ادىلەت ءمينيسترى
ادىلەت ءمينيسترى ازامات ەسقارايەۆ زاڭداردىڭ مەملەكەتتىك تىلدەگى مازمۇنىنا بايلانىستى پىكىر ءبىلدىردى، دەپ حابارلايدى Kazinform.

«زاڭداردى ادىلەت مينيسترلىگىندە تىركەگەن كەزدە مەملەكەتتىك نۇسقاسىنا ساراپتاما جاسايسىزدار ما؟ ويتكەنى قازاقشا زاڭنىڭ تۇسىنىكسىز ەكەنى تۋرالى شاعىم كوپ. ەگەر زاڭنىڭ مەملەكەتتىك تىلدەگى نۇسقاسى تۇسىنىكسىز، ساپاسىز بولسا، كەرى قايتارا الاسىزدار ما؟»، - دەپ سۇرادى جۋرناليست ۆەدومستۆونىڭ بريفينگىسىندە.
ازامات ەسقارايەۆتىڭ ايتۋىنشا، مينيسترلىكتە ونداي قۇزىرەت بار.
«قولدانىستاعى زاڭناما بويىنشا ءار ماتىندە، ءار تىلدە جازىلعان تەكست حالىققا تۇسىنىكتى، قولدانۋعا جەڭىل بولۋى كەرەك دەگەن تالاپ كوزدەلگەن. ەگەر مەملەكەتتىك تىلدە ولقىلىقتار بولسا، ءتيىستى ماماندار مەن ساراپشىلار سول ولقىلىقتاردى انىقتاسا، ونداي زاڭ جوباسىن تىركەۋدەن باس تارتامىز. ياعني، ونى باستاماشى بولعان ورگانعا قايتارامىز»، - دەدى ول.
ۆەدومستۆو باسشىسى مەملەكەتتىك تىلدەگى نۇسقاسىنىڭ ساپاسىز بولۋىنا بايلانىستى كەرى قايتارىلعان زاڭداردىڭ ستاتيستيكاسى جۇرگىزىلمەيتىنىن ايتتى.
«زاڭ جوبالارى تەك ءبىر تىلدەگى مازمۇنى بويىنشا عانا ەمەس، زاڭناماداعى وزگە تالاپتارعا سايكەستىگى بويىنشا ساراپتالادى. سوندىقتان ناقتى مەملەكەتتىك تىلدەگى مازمۇنى بويىنشا ستاتيستيكا جۇرگىزبەيمىز»، - دەدى ازامات ەسقارايەۆ.
سونداي-اق ول كونستيتۋتسيانىڭ قازاق تىلىندەگى نۇسقاسى زاڭ تىلىنە ساي دەپ ەسەپتەيتىنىن ايتتى.
اۆتور
ەسىمجان ناقتىباي