زاڭعار نۇرلان ۇلى الماتىدا الەمنىڭ 72-راكەتكاسىنان جەڭىلدى
استانا. KAZINFORM - قازاقستاندىق تەننيسشى زاڭعار نۇرلان ۇلى ATP 250 ساناتىنداعى Almaty Open تۋرنيرىنىڭ نەگىزگى كەزەڭىندەگى العاشقى كەزدەسۋىن وتكىزدى.
ATP الەمدىك رەيتينگىندە 1308-ورىندا تۇرعان 18 جاستاعى قازاقستاندىق سپورتشى ۇيىمداستىرۋشىلاردىڭ ارنايى شاقىرتۋىمەن (wild card) نەگىزگى كەزەڭگە قاتىسۋ مۇمكىندىگىن الدى. ونىڭ قارسىلاسى الەمدىك رەيتينگتە 72-ورىندا تۇرعان چەحيالىق توماش ماحاچ بولدى.
چەحيالىق تەننيسشى وتانداسىمىزدى 6:2، 6:0 ەسەبىمەن جەڭدى. ماتچ 1 ساعات 3 مينۋتقا سوزىلدى.
ويىن بارىسىندا نۇرلان ۇلى تاجىريبەلى قارسىلاسىنىڭ جوعارى قارقىنىنا توتەپ بەرۋگە تىرىستى. ماحاچ سەگىز ەيس جاساپ، سەگىز برەيك-پوينتتىڭ التاۋىن ءساتتى پايدالاندى.
قازاقستاندىق تەننيسشى التى ۆيننەر جاساپ، 15 قوس قاتەلىك جىبەردى جانە ءتورت برەيك-پوينتتىڭ بىرەۋىن پايدالاندى.
ەسكە سالايىق، زاڭعار نۇرلان ۇلى Almaty Open تۋرنيرىنىڭ جۇپتىق سىنىنا دا قاتىسىپ، قازاقستاننىڭ ءبىرىنشى راكەتكاسى الەكساندر بۋبليكپەن بىرگە ونەر كورسەتتى.
