زاڭعار نۇرلان ۇلى تۇركياداعى جارىستا ۇزدىك اتاندى

استانا. KAZINFORM - قازاقستاندىق زاڭعار نۇرلان ۇلى تۇركيانىڭ يزمير قالاسىندا وتكەن ITF Juniors J100 تۋرنيرىنىڭ جەڭىمپازى اتاندى.

قازاقستاندىق تەننيسشى فينالدا تۇركيانىڭ جاس وسپىرىمدەر اراسىندا ءبىرىنشى، وسى جارىستىڭ 1-راكەتكاسى مەليح اناۆاتاندى تارتىستى ماتچتا 3:6، 7:5، 6:2 ەسەبىمەن ۇتتى.

زاڭعار نۇرلان ۇلى فينالعا بارار جولدا تۇركيانىڭ تاعى ەكى وكىلىنەن ايلاسىن اسىردى.

«فينالدىق باسەكە وتە تارتىستى بولدى. ءبىرىنشى سەتتە ەسە جىبەرگەننەن كەيىن ەكىنشى پارتيادا جوعارى ويىن دەڭگەيىن كورسەتە الدىم. قورىتىندىسىندا جەڭىسكە جەتىپ، جەكەلەي سىندا 2024-جىلداعى العاشقى تيتۋلىما قول جەتكىزگەنىمە قۋانىشتىمىن»، - دەدى زاڭعار نۇرلان ۇلى.

بۇل - ز. نۇرلان ۇلىنىڭ جەكەلەي سىندا ITF Juniors جارىستارىنداعى ءۇشىنشى تابىسى. وتكەن جىلى ول ارمەنيا مەن سلوۆاكيادا ءدال وسىنداي دودالاردا ۇزدىك شىققان ەدى.

ەسكە سالا كەتەيىك، بۇدان بۇرىن الەكساندر بۋبليكتىڭ مادريد ماستەرس تۋرنيرىنىڭ ءۇشىنشى اينالىمىنا شىققانىن جازعان بولاتىنبىز.

سونداي-اق جىبەك قۇلامبايەۆا تۋنيستەگى تۋرنيردىڭ جەڭىمپازى اتاندى.