يزرايلمەن اراداعى شيەلەنىس يران قازاقتارىنا قالاي اسەر ەتتى - ەلشى جاۋابى
استانا. KAZINFORM - يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار قازاقستاندىق ب ا ق وكىلدەرىمەن كەزدەسۋدە ءوز ەلىندەگى ۇلتى قازاق ازاماتتاردىڭ قازاقستانعا قونىس اۋدارۋ مۇمكىندىكتەرى تۋرالى پىكىر ءبىلدىردى.
«يران مەن يزرايل اراسىنداعى جاعداي قايتا ۋشىعۋى مۇمكىن بە؟ سول ماڭعا ساپار جوسپارلاعان، قازىر ەكى ەلدىڭ بىرىندە كاسىپ جۇرگىزىپ، وقۋ وقىپ جۇرگەن قازاقستان ازاماتتارىنا تەگەران تاراپىنىڭ ديپلوماتى رەتىندە قانداي كەڭەس بەرەسىز؟»- دەپ سۇرادى ب ا ق وكىلى.
يران ەلشىسى قازىر يراندا جاعداي تۇراقتى ەكەنىن ايتادى.
«يزرايلدە جۇرگەن قازاقستاندىقتارعا قاتىستى ەشتەڭە ايتا المايمىن. ويتكەنى، ءيزرايلدىڭ كوپتەگەن ازاماتى سىرتقا كەتىپ جاتىر، قاشىپ جاتىر. ال يرانعا كەلسەك، قازىرگى تاڭدا ءبىزدىڭ ەلدە «يران ەكسپو» دەيتىن بيىلعى ەڭ ۇلكەن ساۋدا- ەكونوميكالىق شارا ۇيىمداستىرىلعان. ول جەردە 117 مەملەكەتتىڭ وكىلدەرى، سونىڭ ىشىندە قازاقستاننان وننان استام ادامنان قۇرالعان دەلەگاتسيا قاتىسىپ جاتىر. كەشە عانا وسى كورمە اياسىندا يران مەن قازاقستان كاسىپكەرلەرىنىڭ كەزدەسۋى ءوتىپ، ادام مول جينالدى. قىسقاسى، يراندا جاعداي قالىپتى»، - دەدى ول.
كەزدەسۋدە يرانداعى قازاق دياسپوراسىنىڭ قازىرگى احۋالى دا ءسوز بولدى.
«ونداعى ۇلتى قازاق يران ازاماتتارى قازاقستانعا قونىس اۋدارىپ، ازاماتتىعىن اۋىستىرعىسى كەلسە، تەگەران تاراپىنان قانداي دا ءبىر شەكتەۋ بولۋى مۇمكىن بە؟ قازاقستانعا قايتقىسى كەلەتىن ۇلتى قازاق يران ازاماتتارى بولسا، ولارعا ەشقانداي كەدەرگى بولماي ما؟»- دەپ سۇرادى جۋرناليست.
ەلشى قانداي دا ءبىر ەلدە اسكەري، ساياسي وقيعالار بولعان كەزدە مۇنداي ماسەلەنىڭ ورتاعا شىعۋى قالىپتى جاعداي دەپ ەسەپتەيتىنىن جەتكىزدى.
«ونداي ماسەلە ءار ەلدە بولادى. مىسالى، قازاقستاندا دا داعدارىس جاعدايى بولسا، بىزدەگى ازاماتتار دا سونداي ماسەلەلەر كوتەرۋى مۇمكىن. ءبىراق يراندا جاعداي قالىپتى، ەشقانداي قاۋىپ جوق. حالىقارالىق شارالاردىڭ ءوزى كەستەگە ساي وتەدى. ەلىمىزدەگى شارالارعا الەم ەلدەرىنىڭ 2 مىڭنان استام وكىلى قاتىسىپ جاتىر.
يراننىڭ گۇلستان پروۆينتسياسىندا ۇلتى قازاق يراندىقتار تۇراتىنىن بىلەسىز. وتكەن اپتادا سول جەردە يران حالىقتارىنىڭ مادەني فەستيۆالى ءوتىپ، ۇلتتىق تاعامدارى، كۇرەس تۇرلەرى كورسەتىلدى. سوندىقتان يراندا ەشقانداي الاڭداۋشىلىق جوق. ول جاقتا ەشكىمنىڭ ەشقايدا كوشكىسى كەلمەيدى. قازىر ەكى ەلدىڭ اراسىندا 14 كۇندىك ۆيزاسىز رەجيم بار. سول ارقىلى ەكى ەلدىڭ ازاماتتارى قالاعان ۋاقىتتارىندا كەلىپ، كەتە الادى. سوندىقتان يران قازاقتارىنىڭ اراسىندا ەلدەن كەتۋ تۋرالى الاڭداۋشىلىق بار دەپ ويلامايمىن. يزرايلگە قارسى اسكەري وپەراتسيا بولىپ جاتقان كەزدە مەن يراندا ەدىم. ول كەزدە دە حالىقتىڭ ىشىندە ەشقانداي الاڭداۋشىلىق بولعان جوق»، - دەدى الي اكبار دجوۋكار.
