يزرايلدىڭ «حەزبوللاعا» جاساعان ەڭ ءىرى شابۋىلىنان 180 نەن استام ادام قازا تاپتى
استانا. KAZINFORM - ليۆان ەلىنىڭ دەنساۋلىق ساقتاۋ مينيسترلىگىنىڭ مالىمدەۋىنشە، دۇيسەنبى كۇنى يزرايل اۋە كۇشتەرىنىڭ ليۆانداعى «حەزبوللا» نىساندارىنا جاساعان سوققىلارىنان 180 دەن استام ادام مەرت بولىپ، تاعى 700 ءى جاراقات الدى، دەپ حابارلايدى BBC.
- بۇعان دەيىن ەل تۇرعىندارىنىڭ تەلەفوندارىنا يزرايلدەن ەۆاكۋاتسيالاۋعا شاقىراتىن اۋديو جولدامالار كەلگەن، دەپ حابارلادى ليۆان مەملەكەتتىك ب ا ق.
بۇل گازادا ءبىر جىلعا جۋىق قاقتىعىس كەزىندە يزرايلدىڭ «حەزبوللا» اسكەري توبىنا قارسى ەڭ كەڭ تاراعان اۋە شابۋىلدارى تۇسىندا بولدى.
«بەيرۋت پەن بىرنەشە اۋدانداردىڭ ازاماتتارى يزرايلدىك جاۋدان ستاتسيونارلىق تەلەفوندار ارقىلى ەسكەرتۋلەر الىپ، تەز ەۆاكۋاتسيالانۋعا بۇيرىق الدى»، - دەلىنگەن ليۆاننىڭ رەسمي ۇلتتىق اقپارات اگەنتتىگىنىڭ (NNA) مالىمدەمەسىندە.
ليۆاننىڭ اقپارات ءمينيسترى زياد ماكاريدىڭ حابارلاۋىنشا، ونىڭ كەڭسەسىنە دە ءدال وسىنداي ەسكەرتۋمەن قوڭىراۋ شالىنعان. ماكاري بۇنى يزرايل جۇرگىزگەن پسيحولوگيالىق سوعىستىڭ بولىگى دەپ اتادى.
BBC- ءدىڭ بەيرۋت قالاسىنداعى ءتىلشىسى نافيس كونناۆاردتىڭ حابارلاۋىنشا، دۇيسەنبى كۇنى تاڭەرتەڭ ليۆاننىڭ وڭتۇستىگىندەگى تۇرعىنداردىڭ تەلەفوندارىنا «حەزبوللا» قارۋ ساقتاۋ ءۇشىن پايدالانادى دەپ سانالاتىن تۇرعىن ۇيلەردەن اۋلاق ءجۇرۋدى ەسكەرتكەن ماتىندىك جانە داۋىستىق حابارلامالار كەلدى.
الەۋمەتتىك جەلىدە تاراعان ءبىر بەينەدە كەنت تۇرعىنىنا يزرايل وپەراتسياسى جالعاسىپ جاتقانىن جانە «جاڭا كەزەڭگە» كىرگەنى ايتىلعان دىبىستىق حابارلاما كەلگەنى كورسەتىلگەن.
«ەگەر ءسىز «حەزبوللا» پايدالاناتىن كەنتتە بولساڭىز، ءوز قاۋىپسىزدىگىڭىز ءۇشىن ول جەردەن دەرەۋ كەتىڭىز»، - دەلىنگەن دىبىستىق حابارلامادا.
Ogero مەملەكەتتىك تەلەكوممۋنيكاتسيا كومپانياسىنىڭ باسشىسى يماد كرەيديە AFP اگەنتتىگىنە «ليۆاننىڭ ستاتسيونارلىق جۇيەسى يزرايلدەن كەلەتىن بارلىق حابارلامالاردى بۇعاتتاپ وتىرعانىن»، ءبىراق يزرايل «دوستىق ەلدىڭ حالىقارالىق تەلەفون كودىن پايدالانۋ ارقىلى بايلانىس جۇيەلەرىن اينالىپ ءوتىپ جاتىر» دەدى.
Ogero مالىمەتىنشە، يزرايل قىزمەتتەرى 80 مىڭنان استام ەسكەرتۋ قوڭىراۋىن جاساعان.
