يزرايلدىڭ بەيرۋتكە جاساعان سوققىسىنان ءتورت ادام قازا تاپتى

استانا. KAZINFORM - بەيرۋتتىڭ(ليۆاننىڭ استاناسى - رەد.) وڭتۇستىك شەتىنە جاسالعان يزرايل اۋە شابۋىلىنان قازا تاپقاندار سانى ءتورت ادامعا جەتتى. ونىڭ ەكەۋى ءتورت جانە التى جاستاعى بالالار. بۇل تۋرالى ەلدىڭ دەنساۋلىق ساقتاۋ مينيسترلىگى حابارلادى. بۇعان دەيىن ءبىر ايەل قايتىس بولعانى حابارلانعان بولاتىن، دەپ جازادى تاسس.

Al Mayadeen تەلەارناسىنىڭ حابارلاۋىنشا، ءۇيىندى استىندا قالىپ قويعاندار مەن ءىز-ءتۇزسىز جوعالعانداردى ىزدەۋ ءۇشىن اۋىر تەحنيكا جۇمىلدىرىلدى.

زارداپ شەككەندەر سانى 68 دەن 74 ادامعا دەيىن ءوستى، ولاردىڭ بارلىعى قالالىق اۋرۋحانالاردا ەم الىپ جاتىر. 65 ادام ۇيلەرىنە شىعارىلدى، قالعاندارىنىڭ جاعدايى حيرۋرگيالىق ەمدى قاجەت ەتەدى. شيت حەزبوللا جاساقتارىنىڭ شتاب-پاتەرى ورنالاسقان حارەت-حورەيك كوشەسىندەگى ۇيىندىلەردى جويۋ جۇمىستارى جالعاسىپ جاتىر. كۋاگەرلەر قازا بولعاندار سانى ءالى دە ارتۋى مۇمكىن ەكەنىن ايتادى.

30-شىلدە كۇنى يزرايل اسكەري-اۋە كۇشتەرىنىڭ جويعىش ۇشاعى حەزبوللا بەكىنىسى رەتىندە قىزمەت ەتەتىن بەيرۋتتىڭ وڭتۇستىك شەتىندەگى داحيا قالاسىنا ءتورت زىمىران ۇشىردى. زىمىران قۇلاعان بلوكتا ءتورت قاباتتى عيمارات قيراپ، كورشىلەس عيماراتتار مەن تۇراقتاعى كولىكتەرگە زاقىم كەلدى.

شابۋىلدىڭ ماقساتى - «حەزبوللانىڭ» جەدەل شتابىن باسقارعان اسكەري جەتەكشىسى فۋاد شوكردى جويۋ. العان جاراقاتىنىڭ سالدارىنان ول اۋرۋحانادا قايتىس بولدى، ءبىراق باستاپقىدا ول قاستاندىقتان قۇتىلىپ كەتتى دەپ حابارلانعان بولاتىن.

اۆتور
ەركەجان سماعۇلوۆا