يزرايل تۇركياداعى ديپلوماتتارىن قايتارىپ جاتىر

يزرايل سىرتقى ىستەر ءمينيسترى ەلي كوەن تۇركياداعى ديپلوماتتارىن كەرى قايتارۋ تۋرالى شەشىم قابىلداعانىن مالىمدەدى. Kazinform بۇل تۋرالى BBC گە سىلتەمە جاساپ حابارلايدى.

28- قازان كۇنى كەشكە تۇركيا پرەزيدەنتى رەجەپ تايپ ەردوعان ىستانبۇلدا پالەستينالىقتاردى قولداۋعا باعىتتالعان جانە ميلليوننان استام ادام قاتىسقان ميتينگىدە ءسوز سويلەگەن بولاتىن. ول يزرايل پرەمەر-ءمينيسترى بەنيامين نەتانياحۋدى تەرروريست دەپ اتاپ، يزرايلدى باسقىنشىلىق ءۇشىن كىنالاپ، باتىس ەلدەرىن پالەستينالىقتاردى جاپپاي ءولتىردى دەپ ايىپتادى.

«تۇركيانىڭ مالىمدەمەلەرىن ەسكەرە وتىرىپ، مەن يزرايل مەن تۇركيا اراسىنداعى قارىم-قاتىناستى قايتا باعالاۋ ءۇشىن سول جەردە ورنالاسقان ديپلوماتيا وكىلدەرىن قايتارۋدى بۇيىردىم»، - دەپ جازدى ەلي كوەن X جەلىسىندە (بۇرىنعى Twitter).

ايتا كەتەيىك، ىستانبۇلدا بىرنەشە جىل بۇرىن جابىلعان اتاتۇرىك اۋەجايى اۋماعىندا كوپتەگەن ادامداردىڭ قاتىسۋىمەن پالەستينانى قولداۋ ءۇشىن سانكتسيالانعان اۋقىمدى ميتينگ ءوتتى. وعان تۇركيانىڭ جوعارى لاۋازىمدى تۇلعالارى، شەنەۋنىكتەرى مەن ءىرى كاسىپكەرلەرى قاتىستى جانە ىستانبۇلعا پالەستينا جانە تۇركيا تۋىن ۇستاعان ادامدار جينالدى.