يزرايل تۇركيا دەلەگاتسياسىمەن باكۋدە كەزدەسكەنى تۋرالى مالىمدەمە جاسادى
استانا. KAZINFORM — يزرايل تاراپى وسى ماڭىزدى كەلىسسوزدەردى ۇيىمداستىرعانى ءۇشىن ءازىربايجان پرەزيدەنتى يلحام اليەۆكە العىس ءبىلدىردى، دەپ جازدى انادولى.
يزرايل ۇلتتىق قاۋىپسىزدىك كەڭەسىنىڭ ءتوراعاسى ساحي حانەگبي باستاعان ديپلوماتيالىق جانە قاۋىپسىزدىك سالاسىنداعى دەلەگاتسيا ازەربايجاندا تۇرىك دەلەگاتسياسىمەن كەزدەسۋ وتكىزگەنىن راستادى.
يزرايل پرەمەر- ءمينيسترىنىڭ كەڭسەسى جاريالاعان مالىمدەمەگە سايكەس، پرەمەر- مينيستر بينيامين نەتانياحۋدىڭ نۇسقاۋلارى بويىنشا حانەگبي باستاعان قورعانىس جانە ديپلوماتيا ماسەلەلەرى جونىندەگى دەلەگاتسيا، ونىڭ قۇرامىندا قورعانىس مينيسترلىگى مەن قاۋىپسىزدىك قىزمەتتەرىنىڭ جوعارى لاۋازىمدى وكىلدەرى بار، تۇرىك دەلەگاتسياسىمەن كەزدەسۋ وتكىزدى.
يزرايل تاراپى وسى ماڭىزدى كەلىسسوزدەردى ۇيىمداستىرعانى ءۇشىن ازەربايجان پرەزيدەنتى يلحام اليەۆكە العىس ءبىلدىردى.
كەلىسسوزدەر بارىسىندا تاراپتار وڭىردەگى ءوزارا مۇددەلەردى تالقىلاعان. كەزدەسۋ ناتيجەسىندە ايماقتىق تۇراقتىلىق ءۇشىن ديالوگتى جالعاستىرۋ تۋرالى شەشىم قابىلداندى.
تۇركيا ۇلتتىق قورعانىس مينيسترلىگىنىڭ باسپا ءسوز حاتشىسى، قوعاممەن بايلانىس جونىندەگى كەڭەسشىسى كونتر- ادميرال زەكي اكتۇرك بۇعان دەيىن «يزرايل سيريانىڭ اۋماقتىق تۇتاستىعىنا زيان كەلتىرۋ جانە ەلدىڭ قاۋىپسىزدىگى مەن تۇراقتىلىعىن بۇزۋ ماقساتىندا ارانداتۋشى شابۋىلدارىن جالعاستىرۋدى توقتاتۋى ءتيىس» دەپ مالىمدەگەن بولاتىن.
ول سونداي-اق «9-ءساۋىر كۇنى ازەربايجاندا تۇركيا مەن يزرايل اراسىندا سيريا قالامايتىن وقيعالاردىڭ الدىن الۋ ءۇشىن جانجالداردى بولدىرماۋ تەتىگىن قۇرۋ جونىندە العاشقى تەحنيكالىق كەزدەسۋ وتكەنىن» حابارلادى.
بۇعان دەيىن حابارلانعانداي، ب ۇ ۇ گازاداعى جۋرناليستەرگە يزرايل تاراپىنان قاساقانا جاسالعان شابۋىلعا الاڭداۋشىلىق ءبىلدىردى.
