يزرايل سيريانىڭ ەكى قالاسىنداعى اۋەجايلارعا سوققى جاسادى

 سيريانىڭ داماسك جانە الەپپو قالالارىنداعى اۋەجايلار جۇمىسىن توقتاتتى. Kazinform بۇل تۋرالى سيريالىق Al Watan گازەتىنە سىلتەمە جاساپ حابارلايدى. 

باسىلىمنىڭ جازۋىنشا، يزرايل سيريانىڭ اتالعان ەكى قالاسىنىڭ اۋەجايلارىنا سوققى جاساعان. لوندوندا ورنالاسقان The Syrian Observatory for Human Rights (SOHR) مونيتورينگ توبى سيريانىڭ اۋە قورعانىسى شابۋىلعا تويتارىس بەرۋگە تىرىسقانىمەن، ەش ناتيجە شىقپاعانىن جازدى.

Jerusalem Post مالىمەتىنشە، يراننان سيرياعا بەت العان ۇشاق تەگەرانعا قايتۋعا ءماجبۇر بولعان. اۋەجايلارعا شابۋىل سيرياعا يران سىرتقى ىستەر ءمينيسترى حوسسەين اميرابدوللاحيان كەلەردەن ءبىر كۇن بۇرىن جاسالىپ وتىر.

يزرايل - پالەستينا قاقتىعىسىنان قازا تاپقاندار سانى: يزرايلدە - 1300 ادام، پالەستينادا - 900 ادام، تاعى 4500 ادام جاراقات الدى. يوردان وزەنىنىڭ باتىس جاعالاۋىندا 21 پالەستينالىق ازامات قازا تاپتى، ونداعان تۇرعىن جارالاندى.

7-قازان كۇنى پالەستينالىق حاماس توبى يزرايلگە شابۋىل جاساپ، ەل سوعىس جاعدايىنا كوشكەننەن كەيىن ءبىرقاتار مەملەكەت ازاماتتارىن يزرايلدەن ەۆاكۋاتسيالاۋدى ۇيىمداستىردى. قازاقستان دا اتالعان ەلدە جۇرگەن 124 قازاقستاندىق ءۇشىن رەپاترياتسيالىق رەيس ۇيىمداستىرىپ، ولاردى ەلگە جەتكىزدى.

يزرايل قورعانىس ءمينيسترى يواۆ گاللانت گازا سەكتورى تولىق وقشاۋلاندىرىلعانىن ءمالىم ەتتى. وندا جارىق، تاماق جانە وتىن جوق.

اسكەريلەر پالەستينا تۇرعىندارىنا مىسىرعا قاشۋدى ۇسىندى. 11-قازان كۇنى گازا سەكتورىنداعى جالعىز ەلەكتر ستانتسياسى وتىن تاپشىلىعىنان جۇمىسىن توقتاتتى.

يزرايل قورعانىس اسكەرى (س ا ح ا ل) كەشە حاماس-قا 450 دەن استام سوققى جاسالعانىن ءمالىم ەتتى. سونىمەن قاتار كەشە يزرايل قورعانىس اسكەرى حاماس قوزعالىسى اسكەري قاناتىنىڭ قولباسشىسى موحاممەد دەيفتىڭ ۇيىنە شابۋىل جاساعانى حابارلاندى.

بۇدان بولەك، يزرايل قاۋىپسىزدىككە قاتىستى شەشىمدەردى قابىلداۋ پروتسەسىن نىعايتاتىن توتەنشە ۇكىمەت قۇردى.

 

اۆتور

بالنۇر قوجاگەلدى