يزرايلدە سايلاۋ قارساڭىندا يرانعا سوققى بەرۋ ماسەلەسى تالقىلاندى

يزرايل پرەمەر-ءمينيسترى بينيامين نەتانياحۋ 27-قازاندا وتەتىن كنەسسەت سايلاۋى قارساڭىندا يرانعا الدىن الا سوققى بەرۋدى قولدامايتىنىن مالىمدەدى. بۇل تۋرالى ول سارسەنبى كۇنى يزرايل ارمياسىنىڭ راديوسىنا بەرگەن سۇحباتىندا ايتتى.

ول بۇل پىكىرىن سايلاۋ الدىندا اسكەري قاقتىعىسقا ۇمتىلىپ وتىر دەگەن ساياسي قارسىلاستارىنىڭ ايىپتاۋىنا جاۋاپ رەتىندە ءبىلدىردى.

- قازىر مۇنداي قادامعا باراتىن قولايلى ءسات ەمەس، ودان ەش پايدا جوق، - دەدى نەتانياحۋ.

سونداي-اق ول سايلاۋدان كەيىن يرانعا سوققى بەرۋ مۇمكىندىگى مەن ۆاشينگتونمەن اراداعى سوڭعى كەلىسسوزدەردىڭ مازمۇنىنا تۇسىنىكتەمە بەرمەدى. پرەمەر-مينيستر يزرايلگە شابۋىل جاسالعان جاعدايدا، قارىمتا سوققى بەرەتىنىن تاعى دا اتاپ ءوتتى.

نەتانياحۋدىڭ ايتۋىنشا، يران مەن وعان جاقتاس قارۋلى توپتار سايلاۋعا ىقپال ەتۋ ءۇشىن يزرايلگە شابۋىل جاساۋى مۇمكىن. The Times of israel باسىلىمىنىڭ حابارلاۋىنشا، قاۋىپ يراننىڭ تىكەلەي شابۋىلىنان نەمەسە گازا سەكتورىنداعى حاماس پەن ليۆانداعى «حەزبوللانىڭ» ارەكەتىنەن تۋىندايدى.

بۇعان دەيىن ب ا ق نەتانياحۋدىڭ ا ق ش پرەزيدەنتى دونالد ترامپقا يزرايلدەگى پارلامەنتتىك جانە ا ق ش- تاعى ارالىق سايلاۋلارعا دەيىن يرانعا قارسى اسكەري وپەراتسيالاردى قايتا باستاۋدى ۇسىنعانىن حابارلاعان. الايدا يزرايل پرەمەر-ءمينيسترىنىڭ كەڭسەسى سايلاۋ قارساڭىندا سوعىستى قايتا باستاۋعا ۇمتىلدى دەگەن اقپاراتتى جوققا شىعاردى.

سونىمەن قاتار يزرايلدىڭ قورعانىس ءمينيسترى يسراەل كاتس يراننىڭ شابۋىلىنا «حەزبوللا» قوسىلعان جاعدايدا، ليۆاننىڭ وڭتۇستىگىندە يزرايل ارمياسى باقىلاۋىنداعى اۋماقتى كەڭەيتەتىنىن ەسكەرتتى.

ليۆان اۋماعىنداعى يزرايل جاريالاعان قاۋىپسىزدىك ايماعىنا بارعان يسراەل كاتس ارميانىڭ جاڭا قۇرلىقتاعى وپەراتسياعا دايىن ەكەنىن مالىمدەدى.

- «حەزبوللا» اۋىر سوققىعا ۇشىراپ، ليۆاننىڭ وڭتۇستىگىندەگى ناباتيا مەن ليتاني وزەنى ماڭىنداعى اۋماقتاردان تاعى دا ايىرىلادى. بۇل جەرلەر يزرايلدىڭ تۇراقتى قاۋىپسىزدىك ايماعىنا اينالادى، - دەدى مينيستر.

كاتس بەيرۋتتىڭ وڭتۇستىك ماڭىنداعى «حەزبوللا» ينفراقۇرىلىمىنا سوققى جاسالاتىنىن ەسكەرتىپ، جاڭا قاقتىعىس باستالعان جاعدايدا ميلليوننان استام ليۆاندىق شييتتىڭ باسپاناسىن تاستاپ، بوسىپ كەتۋى مۇمكىن ەكەنىن ايتتى.

ەسكە سالا كەتەيىك، وتكەن اپتادا ترامپ 3-قاراشادا وتەتىن ا ق ش- تاعى پارلامەنت سايلاۋىنا دەيىن يرانعا شابۋىل جاسامايتىنىن حابارلاعان ەدى.