يزرايل قورعانىس ارمياسى گازا سەكتورىنا 100 دەن استام شابۋىل جاسادى

استانا. KAZINFORM - پالەستينا بيلىگى انكلاۆتا 200 ادامنىڭ ءولىمى تۋرالى اقپارات تاراتتى، دەپ حابارلايدى Kazinform ءتىلشىسى.

- يزرايل اسكەري-اۋە كۇشتەرى اسكەري بارلاۋ باسقارماسى مەن شين-بەت قاۋىپسىزدىك قىزمەتى ۇسىنعان بارلاۋ نەگىزىندە IDF وڭتۇستىك قولباسشىلىعىمەن بىرگە بىرنەشە سوققى جاسادى، دەپ حابارلايدى The Times of Israel.

ارميا قولباسشىلىعى وتكەن دەمالىس كۇندەرى يزرايل كۇشتەرى گازا سەكتورىنداعى بىرنەشە زىمىران ۇشىرۋ قوندىرعىلارىنا سوققى بەرگەنىن حابارلادى.

گازا سەكتورىنداعى بيلىك وكىلدەرى 186 ادام اسكەري سوققىلاردىڭ قۇربانى بولعانىن جەتكىزدى. يزرايل اسكەري كۇشتەرى ءوز كەزەگىندە بەيبىت تۇرعىندارعا كەلتىرىلگەن زياندى ازايتۋ ءۇشىن بارلىق قاجەتتى شارانى قابىلداعانىن اتاپ ءوتتى.

AlJazeera حابارلاعانداي، كەيىنگى ءۇش كۇندە يزرايل كۇشتەرىنىڭ جۇزدەن استام سوققىسى 200 پالەستينالىقتى ءولتىردى، قۇربانداردىڭ كوپشىلىگى ايەلدەر مەن بالالار بولدى.

بۇل رەتتە جەكسەنبىدە يزرايل اسكەري كۇشتەرى تۇرعىن ۇيلەرگە، سونداي-اق كوشەلەردە، بازارلاردا جانە باسپانالاردا جينالعان ادامدارعا سوققى بەرۋدى جالعاستىردى.

سونىمەن قاتار گازا سەكتورىندا تاعى ءبىر بالا گيپوتەرميادان قايتىس بولدى. بۇل - انكلاۆتاعى سەگىزىنشى ءولىم.

گازا سەكتورىنىڭ دەنساۋلىق ساقتاۋ مينيسترلىگى 2023 -جىلدىڭ 7-قازانىنان باستاپ گازا سەكتورىنا سوعىس كەزىندە كەم دەگەندە 45805 پالەستينالىق قازا تاۋىپ، 109064 ادام جاراقات العانىن حابارلادى. بۇل رەتتە كەيىنگى 24 ساعات ىشىندە 88 پالەستينالىق قازا تاۋىپ، 208 ادام جاراقات الدى.

قورشاۋعا الىنعان پالەستينا انكلاۆىنا سوققىلار كاتار استاناسىندا ءوتىپ جاتقان يزرايل مەن حاماس اراسىنداعى اتىستى توقتاتۋ تۋرالى جۇمادا باستالعان كەلىسسوزدەر اياسىندا جالعاسىپ جاتىر.

جەكسەنبىدە يزرايل قورعانىس ارمياسىنىڭ باس شتابىنىڭ باستىعى گەرسي حاليەۆي يران الداعى كۇندەرى يزرايلگە قارسى «ەكسترەمالدى» قادامدار جاساۋعا شەشىم قابىلداعان جاعدايدا اسكەرگە جوعارى دايىندىقتا بولۋعا بۇيرىق بەردى.

يزرايلدىك ب ا ق-تىڭ حابارلاۋىنشا، ەسكەرتۋ يراننىڭ ليۆان مەن سيرياداعى ساتسىزدىكتەردەن كەيىن كوپتەگەن قيىندىققا تاپ بولۋىنان تۋىندايدى.

اۆتور

ابىلايحان جۇماشەۆ