يزرايل مەن ليۆان يزرايل اسكەرىن شىعارۋ مەرزىمىن بەلگىلەدى
استانا. KAZINFORM - جەكسەنبى كۇنى اق ءۇي يزرايل مەن ليۆان بيلىگى يزرايل اسكەرىن ليۆان اۋماعىنان شىعارۋ مەرزىمى تۋرالى كەلىسىمدى 18-اقپانعا دەيىن ۇزارتۋدى كەلىسكەنى تۋرالى مالىمدەمە تاراتتى، دەپ حابارلايدى تاسس اقپارات اگەنتتىگى.

- ا ق ش باقىلاۋىنداعى ليۆان مەن يزرايل اراسىنداعى كەلىسىم 2025 -جىلدىڭ 18-اقپانىنا دەيىن كۇشىندە بولادى. ليۆان، يزرايل جانە ا ق ش ۇكىمەتتەرى سونداي-اق 2023 -جىلدىڭ 7-قازانىنان كەيىن ۇستالعان ليۆاندىق تۇتقىنداردى قايتارۋ تۋرالى كەلىسسوزدەردى باستايدى، - دەلىنگەن مالىمدەمەدە.
اتىستى توقتاتۋ تۋرالى 60 كۇندىك كەلىسىم 27-قاراشادا كۇشىنە ەندى. ونىڭ شارتتارىندا يزرايل 27-قاڭتارعا دەيىن ليۆاننىڭ وڭتۇستىگىنەن ءوز اسكەرىن تولىعىمەن شىعاراتىنى كوزدەلگەن.
يزرايل پرەمەر-ءمينيسترى بينيامين نەتانياحۋ كەڭسەسىنىڭ جۇما كۇنى حابارلاۋىنشا، ءيزرايلدىڭ ليۆاننىڭ وڭتۇستىگىنەن اسكەرىن شىعارۋى بەلگىلەنگەن مەرزىمنەن كەيىن جالعاساتىنىن مالىمدەدى، ويتكەنى ليۆاندىق تاراپ كەلىسىم شارتتارىن ءالى تولىق ورىنداماعان: شەكارالىق ايماقتار ليۆان ارمياسىنا بەرىلۋى جانە «حەزبوللا» قوزعالىسىنىڭ قارۋلى كۇشتەرى ليتاني وزەنىنىڭ ارعى جاعىنا شەگىنۋى ءتيىس.
وسمىعان دەيىن يزرايلدىڭ ليۆاننان اسكەرىن شىعارۋ ءۇشىن قوسىمشا 30 كۇن سۇراعانى تۋرالى جازدىق.
اۆتور
زارينا تۋعانبايەۆا