يزرايل حاماسپەن بىتىمگە كەلۋ كەلىسسوزدەرىن قايتا باستاۋ ءۇشىن دەلەگاتسيا جىبەردى

استانا. KAZINFORM - بەيسەنبى كۇنى كەشكە يزرايل ۇكىمەتىنىڭ قاۋىپسىزدىك كابينەتى كەپىلگە الىنعانداردى بوساتۋ جانە قاقتىعىستى توقتاتۋ تۋرالى كەلىسسوزدەردى قايتا باستاۋ ءۇشىن دەلەگاتسيا جىبەرۋدى ماقۇلدادى.

شەشىم حاماس قازىرگى ۇسىنىلىپ وتىرعان كەلىسىمگە سوڭعى تۇزەتۋلەرىن ۇسىنعان كۇننەن كەيىن قابىلداندى، دەپ جازادى The Times of Israel.

پرەمەر-مينيستر بينيامين نەتانياحۋ بەيسەنبى كۇنى ا ق ش پرەزيدەنتى دجو بايدەنمەن تەلەفون ارقىلى سويلەسۋى كەزىندە كەلىسسوزدەرگە دەلەگاتسيا جىبەرۋ شەشىمى تۋرالى مالىمدەدى.

يزرايل شەنەۋنىگىنىڭ ايتۋىنشا، شەشىم قابىلداعانعا دەيىن كەلىسسوز جۇرگىزۋشىلەرمەن كەزدەسۋدە نەتانياحۋ «سوعىس بارلىق ماقساتتارعا قول جەتكىزىلگەننەن كەيىن عانا اياقتالاتىنىن، ودان ءبىر مينۋت تا كەشىكتىرىلمەيتىنىن تاعى دا اتاپ ءوتتى».

بايدەنمەن سويلەسۋ بارىسىندا نەتانياحۋ ءيزرايلدىڭ اسكەري ماقساتتارى وزگەرمەيتىنىن قايتالادى. اق ءۇي بايدەننىڭ پرەمەر-ءمينيستردىڭ كەلىسىمدى جابۋ ماقساتىندا اقش، قاتار جانە مىسىرمەن كەلىسسوز جۇرگىزۋىن قۇپتاعانىن جەتكىزدى.

«يزرايل بارلاۋ قىزمەتىنىڭ باسشىسى دەۆيد بارنەا باستاعان كەپىلگە الىنعانداردى بوساتۋ تۋرالى كەلىسسوزدەر جۇرگىزۋشى يزرايلدىك توپ دەلدالدارمەن كەزدەسۋ ءۇشىن قاتارعا بارادى»، - دەپ حابارلادى يزرايل شەنەۋنىگى The Times of Israel باسىلىمىنا.

بەيسەنبى كۇنگى قاۋىپسىزدىك كابينەتىنىڭ وتىرىسىندا ونىڭ مۇشەلەرى ءيزرايلدىڭ حاماسپەن جاناما كەلىسسوزدەردەگى ۇستانىمىن تالقىلادى. ءيزرايلدىڭ جوعارى لاۋازىمدى شەنەۋنىكتەرى، سونىڭ ىشىندە قورعانىس ءمينيسترى يواۆ گاللانت كەلىسىمگە كەلۋ مۇمكىندىگىنە وپتيميستىك كوزقاراسىن ءبىلدىردى.

ا ق ش شەنەۋنىكتەرىنىڭ ايتۋىنشا، حاماس ءوز ۇستانىمىنا ايتارلىقتاي تۇزەتۋلەر ەنگىزىپ، تۇراقتى اتىستى توقتاتۋعا قادام بولاتىن كەلىسىمگە اكەلەدى دەگەن ءۇمىتىن ءبىلدىردى.