يزرايل باتىس جاعالاۋدا لاڭكەستىككە قارسى وپەراتسيا باستالعانىن جاريالادى
استانا. KAZINFORM - يزرايل قورعانىس كۇشتەرى يوردان وزەنىنىڭ باتىس جاعالاۋىنداعى دجەنين قالاسىندا لاڭكەستىككە قارسى وپەراتسيا باستادى. بۇل تۋرالى يزرايل قورعانىس كۇشتەرى مەن يزرايل قاۋىپسىزدىك قىزمەتى «شين بەتتىڭ» بىرلەسكەن مالىمدەمەسىندە ايتىلدى.

پالەستينا اقپارات قۇرالدارىنىڭ حابارلاۋىنشا، اۋە شابۋىلىنان كەيىن يزرايل اسكەرى دجەنينگە باسىپ كىرگەن.
يزرايلدىك اقپارات قۇرالدارى وپەراتسيا دجەنيندەگى پالەستينالىق توپتار پايدالانعان ينفراقۇرىلىمعا بىرنەشە ۇشقىشسىز ۇشاقپەن سوققى بەرۋدەن باستالعانىن مالىمدەدى.
شابۋىل ناتيجەسىندە سەگىز ادام قازا تاپقانى جانە 35 تەن استام ادامنىڭ جارالانعانى حابارلاندى.
قازىر قالادا ارنايى جاساق، «شين بەت» جانە شەكارا پوليسياسى سياقتى ءىرى قاۋىپسىزدىك كۇشتەرى ارەكەت ەتۋدە.
اسكەريلەردىڭ ايتۋىنشا، وپەراتسيانىڭ ماقساتى - «باتىس جاعالاۋداعى ساحال ارەكەتىنىڭ بوستاندىعىن ساقتاۋ، لاڭكەستىك ينفراقۇرىلىمدى بەيتاراپتاندىرۋ جانە ىقتيمال قاۋىپتەردى جويۋ».
«تەمىر قابىرعا» اتتى وپەراتسيا بىرنەشە كۇنگە سوزىلادى دەپ كۇتىلۋدە.
پرەمەر- مينيستر بينيامين نەتانياحۋ يزرايل ارمياسىنىڭ يوردان وزەنىنىڭ باتىس جاعالاۋىنداعى دجەنين قالاسىنداعى ءىرى وپەراتسياسىن «ياھۋدەيا مەن سامارياداعى قاۋىپسىزدىكتى نىعايتۋ ماقساتىنا جەتۋ جولىنداعى تاعى ءبىر قادام» دەدى.
ياھۋدەيا مەن ساماريا - ءيزرايلدىڭ وڭشىل ساياساتكەرلەرى مەن كەيبىر بۇقارالىق اقپارات قۇرالدارى ءجيى قولداناتىن باتىس جاعالاۋدىڭ بيبليالىق اتاۋى.
وپەراتسيانىڭ باستالۋىنا جاۋاپ رەتىندە گازا سەكتورىنداعى پالەستينالىق حاماس توبى يزرايل كۇشتەرىنە قارسى قول جيناپ جاتقانىن جاريالادى، دەپ حابارلايدى AlJazeera.
The Times of Israel باسىلىمىنىڭ دەرەگىنشە، پالەستينا بيلىگى جانە دجەنيندە ارەكەت ەتەتىن پالەستينالىق توپتارمەن بىتىمگە كەلۋ كەلىسىمى ايقىن بۇزىلعاننان كەيىن يزرايل لاڭكەستىككە قارسى وپەراتسيا باستالعان.