يزرايل گازاداعى پالەستينالىقتارعا وق جاۋدىردى: 10 ادام قازا تاپتى
استانا. KAZINFORM - يزرايل اسكەرى گازا قالاسىنىڭ تۇرعىن اۋداندارىن شابۋىلداۋدى جالعاستىرىپ جاتىر. بۇل تۋرالى انادولى حابارلادى.
يزرايل اسكەرى ءوز ۇيلەرىنەن قۋىلعان پالەستينالىقتار پانالاعان شاتىرلارعا شابۋىل جاساپ، سالدارىنان 10 ادام قازا تاپتى، ونىڭ ىشىندە بالالار دا بار.
كۋاگەرلەردىڭ ايتۋىنشا، يزرايل اسكەرى پالەستينالىق انكلاۆتىڭ وڭتۇستىگىندە ورنالاسقان حان-يۋنۋس قالاسىنداعى شاتىرلارعا شابۋىل جاساعان.
قازا تاپقاندار مەن جارالانعاندار حان-يۋنۋستاعى ناسير اۋرۋحاناسىنا جەتكىزىلدى.
يزرايل اسكەرى 19-قاڭتاردا جاريالانعان ءبىتىم كۇشىنە ەنگەننەن كەيىن ەكى اي وتكەن سوڭ، 18-ناۋرىز تاڭەرتەڭ گازاعا قارسى قارقىندى شابۋىلدارىن قايتا باستادى.
يزرايل اسكەرىنىڭ شابۋىلدارىن قايتا باستاعان ساتتەن بەرى 1652 پالەستينالىق قازا تاۋىپ، ولاردىڭ باسىم كوپشىلىگى - قارتتار، ايەلدەر مەن بالالار، تاعى 4391 ادام جارالاندى.
2023-جىلعى 7-قازاندا يزرايلدىڭ گازاعا شابۋىلدارى باستالعالى بەرى پالەستينالىقتار اراسىنداعى قازا تاپقاندار سانى 51025 ادامعا جەتىپ، جارالانعاندار سانى 116432 ادام.
ايتا كەتەلىك يزرايل اسكەرلەرى گازا سەكتورىندا، ليۆان جانە سيريادا قالادى.
