يزرايل گازاعا گۋمانيتارلىق كومەك كورسەتۋدى توقتاتتى
استانا. KAZINFORM - حاماس لاڭكەستىك توبى اتىستى توقتاتۋ كەلىسىمىن ۇزارتۋدان باس تارتقاننان كەيىن يزرايل ارمياسى گازا سەكتورىنا جۇكتەردى وتكىزۋدى توقتاتتى، دەپ حابارلايدى DW باسىلىمى.
بۇل حابارلاما يزرايل پرەمەر- ءمينيسترى كەڭسەسىنىڭ X الەۋمەتتىك جەلىسىندەگى رەسمي اككاۋنتىندا جاريالاندى.
سونىمەن بىرگە، فرانس پرەسس اگەنتتىگى سەكتورداعى اتقىلاۋدىڭ ءىشىنارا قايتا باستالعانىن مالىمدەدى.
- كەپىلگە الۋ كەلىسىمىنىڭ ءبىرىنشى كەزەڭى اياقتالعاننان كەيىن جانە حاماس- تىڭ يزرايلمەن كەلىسسوزدەردى جالعاستىرۋ ءۇشىن ۆيتكوفف نەگىزدەمەلىك كەلىسىمىن قابىلداۋدان باس تارتۋىنا بايلانىستى پرەمەر- مينيستر نەتانياحۋ شەشىم قابىلدادى: بۇگىن تاڭەرتەڭنەن باستاپ گازا سەكتورىنا كىرەتىن بارلىق تاۋارلار مەن ماتەريالدار توقتاتىلۋى كەرەك. يزرايل كەپىلگە الىنعانداردى بوساتپايىنشا اتىستى توقتاتۋعا جول بەرمەيدى. ەگەر حاماس ودان باس تارتۋدا تاباندىلىق تانىتسا، ودان ءارى زارداپتارى بولادى، - دەلىنگەن مالىمدەمەدە.
ا ق ش پرەزيدەنتىنىڭ تاياۋ شىعىستاعى وكىلى ستيۆ ۆيتكوفف يزرايل مەن حاماس لاڭكەستەرىنە 29 -ناۋرىزدا اياقتالاتىن مۇسىلمانداردىڭ قاسيەتتى رامازان ايى مەن يەۆرەيلەردىڭ قۇتقارىلۋ مەيرامى 12-20 -ءساۋىر ارالىعىندا اتىستى توقتاتۋ تۋرالى كەلىسىمگە كەلۋدى ۇسىندى. يزرايل بۇل ۇسىنىسقا كەلىستى.
حاماس بۇعان دەيىن بىتىمگەرشىلىكتى ۇزارتۋ يدەياسىن بىرنەشە رەت قابىلدامادى. سونىمەن بىرگە سودىرلار جۇككە قاتىستى يزرايلدىڭ شەشىمىن سىنعا الدى.
«گۋمانيتارلىق كومەكتى توقتاتۋ تۋرالى شەشىم ارزان بوپسالاۋ، اسكەري قىلمىس جانە اتىستى توقتاتۋ تۋرالى كەلىسىمگە اشىق شابۋىل بولىپ تابىلادى»، - دەپ كەلتىرەدى فرانس پرەسس اگەنتتىگى.
ونىڭ ايتۋىنشا، لاڭكەستەر اتىستى توقتاتۋ كەلىسىمىنىڭ ۇزارتىلۋىنا قارسى، ويتكەنى بۇل قاڭتارداعى اتىستى توقتاتۋ كەلىسىمىنىڭ ءبىرىنشى كەزەڭى اياسىندا جۇزەگە اساتىن ەدى. حاماس ەكىنشى كەزەڭگە جىلدام ءوتۋدى، ياعني يزرايلدىك كەپىلگە الىنعانداردى سودىرلارعا ايىرباستاۋدى جانە گازادان يسد كۇشتەرىن شىعارۋدى قالايدى.
