يزرايل گازا سەكتورىندا ەلەكتر قۋاتىن ءسوندىرىپ، سوعىستى قايتا باستاۋى مۇمكىن
استانا. KAZINFORM - يزرايل ح ام ا س- قا قىسىمدى كۇشەيتۋ ءۇشىن پالەستينالىقتاردى سولتۇستىك انكلاۆتان كوشىرىپ، ەلەكتر قۋاتىن ءسوندىرىپ، بومبىلاۋدى باستاۋى ىقتيمال، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يزرايل پالەستينالىق توپتار ۇستاپ وتىرعان كەپىلدىكتەگى ادامداردى بوساتۋدى قامتاماسىز ەتەتىن اتىستى توقتاتۋ تۋرالى كەلىسىمنىڭ ءبىرىنشى كەزەڭىن جالعاستىراتىن جاڭا ۇسىنىس جاساتۋ ءۇشىن ح ا م ا س- قا بىرتە- بىرتە قىسىم جاساي بەرۋدى كوزدەپ وتىر. بۇل تۋرالى يزرايلدىڭ Kan قوعامدىق تەلەارناسى حابارلادى.
گازا سەكتورىنا گۋمانيتارلىق كومەك جەتكىزۋ جەكسەنبى كۇنى توقتاتىلدى. يزرايل تاراپىنان جاسالاتىن قىسىم وسى باعىتتاعى شارالاردىڭ قوسىمشاسى بولماق.
بۇعان جاۋاپ رەتىندە ح ا م ا س كەپىلدىككە الىنعان قالعان ادامداردى تاتۋلاسۋ تۋرالى كەلىسىمنىڭ ەكىنشى كەزەڭىندە بوساتاتىنىن جەتكىزدى.
پالەستينالىق ح ا م ا س قوزعالىسى ءيزرايلدىڭ بۇل ارەكەتىن اتىستى توقتاتۋ تۋرالى كەلىسىمگە كەرى اسەرىن تيگىزەتىن لاس ارەكەت ءارى اسكەري قىلمىس دەپ باعالادى.
تەلەارنانىڭ حابارلاۋىنشا، يزرايلدىڭ بارىنشا قىسىم كورسەتۋگە باعىتتالعان جوسپارى كەيىنگى بىرنەشە اپتادا دايىندالعان. وعان سايكەس گازا سەكتورىنىڭ تۇرعىندارى سولتۇستىكتەن وڭتۇستىككە قاراي قايتا كوشىرىلەدى. مۇنداي ارەكەت سوعىستىڭ باسىم بولىگىندە قايتالانىپ كەلدى. كەيىنىرەك قاجەت بولسا ەلەكتر قۋاتى دا ءسوندىرىلۋى مۇمكىن.
سوڭعى جوسپارلانعان شارالارعا سايكەس، اسكەري ارەكەتتەر قايتا جاندانادى. بۇل جولى ا ق ش- تىڭ وسىعان دەيىنگى اكىمشىلىگى يزرايلگە جەتكىزىپ كەلگەن جانە قولدانىلۋىنا شەكتەۋ قويعان اۋىر بومبالار مەن ميللياردتاعان دوللاردىڭ قارۋى مەن اسكەري تەحنيكالارى قولدانىلاتىن بولادى.
بۇل رەتتە ساۋد ارابياسى، مىسىر، يوردانيا، كاتار، ەۋرووداق پەن يسلام ىنتىماقتاستىق ۇيىمى گازا سەكتورىنا گۋمانيتارلىق كومەك جەتكىزۋدى توقتاتۋ جونىندەگى شەشىمدى ايىپتاعان بولاتىن.
ب ۇ ۇ مەن گۋمانيتارلىق ۇيىمدار گازانىڭ بەيبىت تۇرعىندارىنا وراسان زور زيانىن تيگىزەتىنىن ايتىپ، يزرايلدى بلوكادانى الىپ تاستاۋعا شاقىردى.
