يزرايل اسكەرى سيريادا 100 نىساناعا سوققى بەردى
استانا. KAZINFORM - سوققىلار اسكەري بازالارعا، بارلاۋدى باسقارۋ ورتالىقتارىنا، قارۋ قويمالارىنا، اۋە شابۋىلىنا قارسى قورعانىس جۇيەلەرىنە جانە قارۋ-جاراق شىعاراتىن نىسانالارعا جاسالدى، دەپ حابارلايدى انادولى.
يزرايل اسكەرى 61 جىل بۇرىنعى بااس رەجيمى قۇلاعاننان كەيىن سيرياداعى 100 نىسانعا اۋە شابۋىلىن جاسادى.
يزرايلدىڭ Channel 13 تەلەارناسىنىڭ حابارلاۋىنشا، يزرايل اسكەرى سيريانىڭ تۇكپىر-تۇكپىرىندەگى ستراتەگيالىق نىساندارعا اۋەدەن سوققى بەرگەن.
حاباردا شابۋىلداردىڭ ماقساتى سيريا ارمياسىنىڭ قالعان اسكەري مۇمكىندىكتەرىن مۇمكىندىگىنشە السىرەتۋ ەكەنى باسا ايتىلعان. سوققىلار اسكەري بازالارعا، بارلاۋدى باسقارۋ ورتالىقتارىنا، ءارتۇرلى پوليگونداعى زىمىران قويمالارىنا، اۋە شابۋىلىنا قارسى قورعانىس جۇيەلەرىنە، قارۋ-جاراق شىعاراتىن نىساندارعا جانە ءداستۇرلى ەمەس قارۋ قويمالارىنا جاسالعان.
اۋە شابۋىلدارىنان بولەك، يزرايل جەردەگى وپەراتسيالاردى باستاپ، شەيح تاۋىنىڭ سيريا جاعىن باسىپ الىپ، گولانداعى بۋفەرلىك ايماققا ءوز اسكەرلەرىن ورنالاستىرعان.
سيريانىڭ اۋە شابۋىلىنا قارسى قورعانىس جۇيەلەرىن جويۋ يزرايلگە وپەراتسيانى الدەقايدا جەڭىل جۇرگىزۋگە مۇمكىندىك بەرەتىنى اتاپ وتىلگەن.
اۋە شابۋىلدارىنان بۇرىن يزرايل ارمياسى كۋنەيترا پروۆينتسياسى مەن كورشىلەس ەلدى مەكەندەر، سونىڭ ىشىندە افانيا، حاميديا، باتىس سامدانيا جانە كافتانيا تۇرعىندارىن ۇيلەرىندە قالۋعا شاقىردى.
6-جەلتوقساندا يزرايل ارمياسى سيرياداعى وقيعالارعا بايلانىستى باسىپ الىنعان گولان توبەلەرىندەگى پوزيتسيالارىن نىعايتقانىن حابارلادى. 8-جەلتوقساندا بۋفەرلىك ايماققا قوسىمشا كۇش جىبەردى.
يزرايل سيرياعا تيەسىلى گولان توبەلەرىن 1967-جىلدان بەرى ۇستاپ وتىر. 1974-جىلى ەكى ەل بۋفەرلىك ايماق پەن قارۋسىزداندىرىلعان اۋماقتاردىڭ شەكاراسىن انىقتايتىن اسكەرلەردى ءبولۋ تۋرالى كەلىسىمگە قول قويعان.
ايتا كەتەيىك، بۇعان دەيىن ا ق ش سيرياداعى 75 تەن استام نىساناعا سوققى بەرگەنىن جازعان ەدىك.
