يزرايل ارمياسى رافاح قالاسىنا ىلگەرىلەي ەنىپ بارادى
استانا. KAZINFORM - يزرايل تانكتەرى گازا سەكتورىنداعى رافاح قالاسىنىڭ شىعىس تۇسىنا ەندەي كىرىپ بارادى. بۇگىن ولار ءبىرقاتار تۇرعىن ءۇي اۋدانىنا جەتىپ، قالانىڭ وڭتۇستىك شەكارا ماڭىنداعى شابۋىلىن كۇشەيتە ءتۇستى. ءدال وسى وڭىردە سوعىس باستالعان 7 ايدىڭ ىشىندە ميلليوننان استام ادام باس ساۋعالاعان بولاتىن.
يزرايل اسكەريلەرىنىڭ مالىمەتىنشە، وتكەن تاۋلىكتە يزرايلدىك شابۋىلداۋشى ۇشاقتار، ۇشقىشسىز باسقارىلاتىن اپپاراتتار مەن تىكۇشاقتار گازا سەكتورىنداعى 100 دەن استام نىساناعا سوققى جاساعان. سوعىس ءىس-قيمىلدارى رافاح، زەيتۋن جانە دجاباليدە جالعاسىپ جاتىر.
سونىمەن قاتار يزرايل قورعانىس ارمياسى (تساحال) گازا سەكتورىندا ب ۇ ۇ كولىگىنىڭ شابۋىلعا ۇشىراۋىنا بايلانىستى تەرگەۋ ءجۇرىپ جاتقانىن مالىمدەدى.
پالەستيندىك ب ا ق مالىمەتىنشە، جەكسەنبى كۇنى گازا سەكتورىنىڭ وڭتۇستىگىندە، رافاحتا بىرىككەن ۇلتتار ۇيىمىنىڭ كولىگىنە وق اتىلعان. سونىڭ سالدارىنان پالەستيندىك جۇرگىزۋشى مەرت بولىپ، ب ۇ ۇ قىزمەتكەرى جاراقات العان.
ب ۇ ۇ باس حاتشىسى يزرايل مەن گازا سەكتورى اراسىنداعى سوعىس سالدارىنان بىرىنەشە شەتەلدىك قىزمەتكەردىڭ مەرت بولۋىن ايىپتاپ، «تولىقتاي تەرگەۋ جۇرگىزۋدى» تالاپ ەتىپ وتىر.
رافاحتاعى تسااحال وكىلدەرى «ياحال» ىرىكتەۋلى ينجەنەرلىك-ساپەرلىك بولىمشەسىنىڭ 2 جاۋىنگەرى حاماس اتقان مينومەت سناريادتارىنان قاتتى جاراقاتتانعاندىعىن العا تارتادى. ال پالەستيندىك توپ وتكەن اپتادا تساحال جاۋىنگەرلەرى باسىپ العان رافاح قالاسىنىڭ مىسىرمەن باقىلاۋ-وتكىزۋ پۋنكتى جانىنداعى يزرايلدىك اسكەرگە سوققى جاساعاندىعىن مالىمدەپ وتىر.
