يزرايل ارمياسى ليۆاننىڭ وڭتۇستىگىندە «حەزبوللاعا» قارسى قۇرلىق وپەراتسياسىن باستادى

استانا. KAZINFORM - يزرايل ارمياسى دۇيسەنبى كۇنى ليۆاننىڭ وڭتۇستىگىندە ورنالاسقان شەكارالىق اۋداندارداعى ليۆاندىق «حەزبوللا» توبىنىڭ نىساندارىنا «شەكتەلگەن وپەراتسيا» باستاعانىن حابارلادى، دەپ جازادى BBC News.

«بىرنەشە ساعات بۇرىن ساحال ليۆاننىڭ وڭتۇستىگىندەگى «حەزبوللانىڭ» لاڭكەستىك ورىندارى مەن ينفراقۇرىلىمىنا قارسى ناقتى بارلاۋ اقپاراتىنا نەگىزدەلگەن شەكتەۋلى جانە ماقساتتى جەرۇستى رەيدتەرىن باستادى. بۇل نىساندار شەكاراعا جاقىن اۋىلداردا ورنالاسقان جانە يزرايلدىڭ سولتۇستىگىندەگى يزرايلدىك قاۋىمداستىقتارعا تىكەلەي قاۋىپ توندىرەدى»، - دەلىنگەن ساحال مالىمدەمەسىندە.

دۇيسەنبى كۇنى يزرايل ۇنەمى «حەزبوللا» سودىرلارىنىڭ اتقىلاۋىنا ۇشىرايتىن ەلدىڭ سولتۇستىك ايماقتارىن قورعاۋ ءۇشىن ليۆان شەكاراسىندا قۇرلىقتاعى وپەراتسياعا دايىندالىپ جاتقانى تۋرالى حابار تارادى.

دۇيسەنبى كۇنى كەشكە يزرايلدە اسكەري مينيسترلەر كابينەتىنىڭ وتىرىسى ءوتتى. يزرايلدىك ب ا ق-تىڭ حابارلاۋىنشا وندا حەزبوللاعا قارسى وپەراتسيانىڭ كەلەسى كەزەڭى بەكىتىلدى. اقش مەملەكەتتىك دەپارتامەنتىنىڭ باسپا ءسوز حاتشىسى مەتتيۋ ميللەر بريفينگتە يزرايل بيلىگى ۆاشينگتوندى «ءبىرقاتار وپەراتسيالار» جاسالاتىنى تۋرالى سونىڭ ىشىندە ليۆانداعى جەرۇستى وپەراتسيالارى تۋرالى حاباردار ەتكەنىن ايتتى.

دۇيسەنبى كۇنى يواۆ گالانت ليۆان شەكاراسىنا جاقىن جينالعان اسكەرلەرگە قاراتا سويلەگەن سوزىندە:

«(حاسان) ناسراللانى جويۋ ماڭىزدى قادام، ءبىراق سوڭعى ەمەس. سولتۇستىك تۇرعىندارىن امان-ەسەن ۇيلەرىنە قايتارۋ ءۇشىن ءبىز سىزدەردى قوسا العاندا، بارلىق مۇمكىندىگىمىزدى پايدالانامىز»، - دەدى.

دۇيسەنبى كۇنى كەشكە يسد يزرايلدىڭ ليۆانمەن شەكاراسىنداعى اۋماقتى كىرۋگە تىيىم سالىنعان جابىق اسكەري ايماق دەپ جاريالادى. بۇل ايماق شەكاراداعى سالىستىرمالى تۇردە شاعىن جەر، ياعني ول ءۇش جاعىنان ليۆان تەرريتورياسىمەن قورشالعان.

«حەزبوللا» جەتەكشىسىنىڭ ورىنباسارى نايم كاسسەم بۇل توپتىڭ يزرايل شابۋىلىنا دايىن ەكەنىن ايتتى. ول ۇيىمنىڭ باسشىسى حاسان ناسراللا مەن ءبىرقاتار جوعارى لاۋازىمدى قولباسشىنىڭ قازاسى توپ ءۇشىن كۇشتى سوققى بولعانىن مويىندادى، ءبىراق ونىڭ اسكەري مۇمكىندىكتەرى وزگەرىسسىز قالعانىن اتاپ ءوتتى.

اۆتور
ەركەجان سماعۇلوۆا