يزرايل ارمياسى ەلدىڭ وڭتۇستىگىندەگى بارلىق ەلدى مەكەندى باقىلاۋعا العانىن مالىمدەدى
يزرايل ارمياسىنىڭ وكىلى دۇيسەنبى كۇنى تاڭەرتەڭ يزرايل بارلىق ەلدى مەكەندى باقىلاپ وتىرعانىن جانە قازىر مۇندا ەشقانداي قاقتىعىس جوق ەكەنىن مالىمدەدى.

الايدا ول يزرايل اۋماعىندا ءالى دە حاماس سودىرلارى بار ەكەنىن مويىندادى. Kazinform اگەنتتىگىنىڭ ءتىلشىسى بۇل تۋرالى The Times of Israel باسىلىمىنا سىلتەمە جاساپ حابارلايدى.
يزرايل قورعانىس كۇشتەرىنىڭ (ساحال) باس وكىلى كونتر- ادميرال دانيەل حاگاري يزرايل اسكەرلەرىنىڭ گازا سەكتورىمەن شەكارالاس بارلىق ەلدى مەكەندەردى باقىلاۋعا العانىن ايتتى.
ونىڭ ايتۋىنشا، سوڭعى بىرنەشە ساعاتتا اسكەريلەر مەن پالەستينالىق لاڭكەستەر اراسىنداعى قاقتىعىس وقيعالارى كوپ بولعان جوق. حاگاري اسكەريلەر شاار حانەگە ايماقتىق كەڭەسىندە ءۇش، بەەردە ءبىر، حوليت پەن سۋفادا بەس جانە الۋميمدە تاعى ءتورت لاڭكەستى ولتىرگەنىن ايتتى.
«بۇل ايماقتا لاڭكەستەر ءالى دە بولۋى ابدەن مۇمكىن»، - دەدى حاگاري.
مالىمدەمەگە سايكەس، قازىر ەشبىر قالادا قاقتىعىس بولىپ جاتقان جوق. گازا سەكتورىنداعى شەكارالىق توسقاۋىل تانكتەر، شابۋىل تىكۇشاقتارى جانە ۇشقىشسىز ۇشاقتارمەن فيزيكالىق تۇردە قورعالاتىن بولادى. يزرايل ارمياسى گازا سەكتورى شەكاراسىنداعى 24 قالانىڭ 15 ءىن ەۆاكۋاتسيالادى، قالعاندارىن الداعى كۇنى كوشىرۋدى جالعاستىرادى. ونىڭ ايتۋىنشا، بۇل كەزەڭدە سدەروت قالاسىنىڭ تۇرعىندارى ەۆاكۋاتسيالانبايدى.
سەنبى كۇنى تاڭەرتەڭ اسكەري ءىس- قيمىلدار باستالعاننان بەرى يزرايلگە 4400 دەي زىمىران اتىلدى. سونداي- اق ساحال 48 ساعات ىشىندە 300 مىڭ رەزەرۆيست جيناعانىن حابارلاندى.