يزرايل ارمياسى گازا سەكتورىنداعى حاماس تۋننەلدەرىنە سۋ جىبەرە باستادى
يزرايل ارمياسى (تساحال) گازا سەكتورىنداعى تۋننەل جەلىلەرىنە تەڭىز سۋىن ايداي باستادى. Kazinform بۇل تۋرالى Wall Street Journal باسىلىمىنا سىلتەمە جاساپ حابارلايدى.
بۇعان دەيىن يزرايل ارمياسى گازا سەكتورىنداعى حاماس تۋننەل جۇيەلەرىن تەڭىز سۋىنا تولتىرۋ ءۇشىن قۇبىرلار ورناتقان. انكلاۆتىڭ سولتۇستىگىندەگى «اش-شاتي» بوسقىندار لاگەرىنىڭ ماڭىنا بەس قۇبىر ورناتىلدى. قۇبىرلاردىڭ كومەگىمەن حاماس تۋننەلدەرىن جەرورتا تەڭىزىنىڭ سۋىمەن بىرنەشە اپتادا-اق تولتىرۋعا بولادى.
يزرايل قورعانىس مينيسترلىگىنىڭ وكىلى تۋننەلدەردەگى وپەراتسيالار قۇپيا دەپ، تۇسىنىك بەرۋدەن باس تارتتى. الايدا Wall Street Journal يزرايل ارمياسىنىڭ وپەراتسيالارى جايلى بىلەتىن امەريكالىق شەنەۋنىكتەرگە سىلتەمە جاساي وتىرىپ، سۋ ايداۋ پروتسەسى باستالعانىن جانە جەراستى ينفراقۇرىلىمىن بۇزۋ جۇمىستارى قارقىندى جۇرگىزىلىپ جاتقانىن جازدى.
ەستەرىڭىزگە سالا كەتەيىك، تساحالدىڭ رەسمي وكىلى كونتر-ادميرال دانيەل حاگاري يزرايل اسكەرىنىڭ پالەستينا الاڭىنىڭ استىنان گازا قالاسىنىڭ ۇلكەن تۋننەلدەر جەلىسىن تاپقانىن ايتقان بولاتىن.
سونىمەن قاتار يزرايل مەن حاماس اراسىنداعى كەپىلگە الۋ تۋرالى جاڭا كەلىسسوزدەر كەلەسى اپتادا جۇرگىزىلۋى مۇمكىن ەكەنى حابارلاندى.
