يزرايل پالەستينالىقتاردىڭ ورنىنا ءۇندىستان مەن وزبەكستان ازاماتتارىن جۇمىسقا الىپ جاتىر

استانا. KAZINFORM - يزرايل ۇكىمەتى 7-قازاننان بەرى توقتاتىلعان قۇرىلىس جۇمىستارىن قايتا باستاۋ ءۇشىن ءۇندىستان، شري-لانكا جانە وزبەكستاننان 65 مىڭ جۇمىسشى اكەلەتىنىن مالىمدەدى. بۇل تۋرالى Reuters اگەنتتىگى حابارلادى.

شابۋىل الدىندا 72000 عا جۋىق پالەستينالىق جۇمىسشى يزرايلدەگى قۇرىلىس الاڭدارىندا جۇمىس ىستەگەن. ۇكىمەت قاۋىپسىزدىك ماسەلەلەرىنە بايلانىستى ولاردى جۇمىستان شىعارىپ، يزرايلدەن شىعىپ كەتۋگە ماجبۇرلەگەن.

قازىرگى ۋاقىتتا مەملەكەتتە 20 مىڭعا جۋىق شەتەلدىك جۇمىسشى قالدى. ءبىراق جۇمىس كۇشىنىڭ تاپشىلىعىنا بايلانىستى ەلدەگى قۇرىلىس الاڭدارىنىڭ جارتىسىنا جۋىعى جابىلعان.

يزرايلدىڭ تۇرعىن ءۇي مينيسترلىگىنىڭ وكىلىنىڭ ايتۋىنشا، الداعى اپتالاردا شەتەلدىك جۇمىسشىلاردىڭ جاڭا توبى كەلەدى دەپ جوسپارلانعان. ويتكەنى ۇكىمەت پايىزدىق مولشەرلەمەلەر تومەندەي باستاعاندا جىلجىمايتىن مۇلىك باعاسىنىڭ قايتا جاندانۋ قاۋپىن بولدىرماۋعا تىرىسىپ جاتىر.