ۆيزا، ۇشاق، ترانزيت: ا ق ش- قا قاشان تىكەلەي ۇشامىز

1. FAA تەكسەرىسى جانە رۇقسات الۋ

ا ق ش فەدەرالدىق اۆياتسيا اكىمشىلىگى (FAA) قازاقستاننىڭ ازاماتتىق اۆياتسيا جۇيەسىنە تەكسەرۋ جۇرگىزدى. ەندى انىقتالعان كەمشىلىكتەردى تۇزەتۋ قاجەت. قازاقستان ا ق ش-قا رەيس اشۋ ءۇشىن Category 1 مارتەبەسىن جانە ا ق ش كولىك مينيسترلىگىنىڭ (DOT) ەكونوميكالىق رۇقساتىن الۋى ءتيىس.

2. ۇشاق ماسەلەسى

ا ق ش-قا ۇزاق قاشىقتىققا ۇشۋعا ارنالعان Boeing 787 Dreamliner ۇشاقتارى قاجەت. Air Astana العاشقى ۇشاعىن 2026-جىلدىڭ جەلتوقسانىندا الۋدى جوسپارلاپ وتىر. ۇشاقتىڭ جەتكىزىلۋى وندىرىستەگى كىدىرىستەرگە بايلانىستى كەيىنگە شەگەرىلگەن.

3. ۇشۋ مارشرۋتى

گەوساياسي جاعدايعا بايلانىستى Air Astana رەسەيدىڭ اۋە كەڭىستىگىن پايدالانبايدى. سوندىقتان ەۋروپادا ارالىق ايالداما جاساۋ نەمەسە بەسىنشى ەركىندىك قۇقىعىن پايدالانۋ نۇسقالارى قاراستىرىلۋى مۇمكىن. بۇل رەتتە تىكەلەي رەيس پەن توقتاۋسىز رەيستىڭ ايىرماشىلىعى بار.

4. جانارماي مەن اۋەجاي ينفراقۇرىلىمى

ۇزاق قاشىقتىققا ۇشاتىن رەيستەردە جانارماي شىعىنى جالپى شىعىننىڭ ۇشتەن ءبىرىن قۇرايدى. سوندىقتان وتىن باعاسى مەن جەتكىزىلۋ كولەمى ماڭىزدى. سونىمەن قاتار نيۋ-يورك اۋەجايىنان ۇشىپ-قونۋ سلوتتارىن الۋ قاجەت. بۇل قىمبات ءارى كۇردەلى پروتسەسس بولۋى مۇمكىن.

5. جولاۋشىلار سۇرانىسى جانە رەيستىڭ تيىمدىلىگى

تەك قازاقستان ازاماتتارىنىڭ سۇرانىسىنا سۇيەنۋ جەتكىلىكسىز. ا ق ش ۆيزاسىن الۋ تالاپتارى دا جولاۋشىلار سانىنا اسەر ەتۋى مۇمكىن. سوندىقتان رەيستىڭ تابىستى بولۋى ءۇشىن ورتالىق ازيا ەلدەرىنەن كەلەتىن ترانزيتتىك جولاۋشىلاردى تارتۋ ماڭىزدى. جۇك تاسىمالى دا قوسىمشا تابىس كوزى بولا الادى.

قازاقستان ورتالىق ازيانىڭ اۋە حابىنا اينالا الا ما؟

قازاقستاننىڭ اۋەجاي ينفراقۇرىلىمى دامىپ كەلەدى. الماتى، قىزىلوردا جانە شىمكەنت اۋەجايلارىندا جاڭا تەرمينالدار اشىلدى. 2030 -جىلعا قاراي ەلدەگى كوممەرتسيالىق ۇشاقتار سانىن 160 قا جەتكىزۋ جوسپارلانعان.

ساراپشىلاردىڭ پىكىرىنشە، قازاقستاننىڭ اۋە حابىنا اينالۋى ءۇشىن الماتى مەن استانا ارقىلى 60-90 مينۋت ىشىندە ىڭعايلى ترانزيت ۇيىمداستىرۋ قاجەت. سونداي-اق رەيستەردىڭ جيىلىگى، قىزمەت ساپاسى، باگاج جۇيەسى جانە اۋە كەمەلەرىنىڭ جەتكىلىكتى بولۋى ماڭىزدى.

قورىتىندى: قازاقستاننان ا ق ش- قا تىكەلەي رەيس اشۋ 2027 -جىلدىڭ ەكىنشى جارتىسىنا جوسپارلانعان. ءبىراق ونىڭ ناقتى ىسكە قوسىلۋى FAA جانە DOT رۇقساتتارىنا، Boeing 787 ۇشاقتارىنىڭ جەتكىزىلۋىنە، ءتيىمدى مارشرۋت پەن جولاۋشىلار سۇرانىسىنا بايلانىستى.