ۇيىندە زاڭسىز تاپانشا مەن مىلتىق ساقتاعان وزبەكستاندىقتار ۇستالدى
تاشكەنت. KAZINFORM - وزبەكستاننىڭ مەملەكەتتىك قاۋىپسىزدىك قىزمەتى (م ق ق) مەن ىشكى ىستەر ورگاندارىنىڭ قىزمەتكەرلەرى بىرلەسىپ، ەل استاناسىندا زاڭسىز قارۋ ساقتاعان بۇحارا وبلىسىنىڭ تۇرعىندارىن ۇستادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزگە ءىستى تەرگەۋ بارىسىندا ۇستالعان ازاماتتاردىڭ ۇيىندە جاسىرىلعان قارۋ مەن وق-دارىلەر بار ەكەنى انىقتالعان.
1973 -جىلى تۋعان كۇدىكتىنىڭ تۇرعىلىقتى جەرىن تەكسەرۋ كەزىندە ودان 3 «ماكاروۆ» تاپانشاسى مەن 21 پاترون جانە 1 «تت» تاپانشاسى، سايكەسىنشە ونىڭ 5 وق- ءدارىسى تابىلعان. بۇعان قوسا شاتىردىڭ استىنا جاسىرىلعان قارۋدىڭ داۋىسىن باسەڭدەتەتىن 1 قۇرىلعى تاركىلەندى.
م ق ق باسپا ءسوز قىزمەتىنەن ءمالىم ەتكەندەي، كۇدىكتى ءوزىنىڭ تانىستارىمەن بىرگە ول قارۋ مەن وق-دارىلەردى رەسەيدەن كونتراباندالىق جولمەن الىپ كەلگەن.
ساراپتامانىڭ ناتيجەسىنە ساي، تاركىلەنگەن تاپانشالار مەن ونىڭ پاتروندارى اتىس جاعدايىندا قولدانۋعا جارامدى سانالادى.
سونىمەن قاتار كۇدىكتىنىڭ سەرىكتەستەرى دە ۇيىندە قارۋ ساقتاعان. ءتىنتۋ بارىسىندا ول ازاماتتان ءتيىستى قۇجاتتارى جوق 2 اڭشىلىق مىلتىق پەن وق-دارىلەر تاركىلەندى.
اتالاعان فاكتىلەر نەگىزىندە ءور قىلمىستىق كودەكسىنىڭ 246 (كونتراباندا) جانە 248 (اتىس قارۋى مەن وق- دارىلەردىڭ زاڭسىز ساقتاۋ) باپتارى بويىنشا قىلمىستىق ءىس قوزعالدى، تەرگەۋ ءجۇرىپ جاتىر.
