ۇيدەگى ۇرىس-كەرىس بالانىڭ بولاشاعىنا قالاي اسەر ەتەدى - مامان پىكىرى

استانا. KAZINFORM - وتباسىنداعى زورلىق-زومبىلىققا كۋا بولعان بالالاردىڭ باستان وتكەرگەن قورقىنىشى مەن كۇيزەلىسى ولاردىڭ ەرەسەك ومىرىنە دە اسەر ەتۋى مۇمكىن. كەيبىر بالالاردا ۇزاققا سوزىلعان كۇيزەلىستەن تۇتىعۋ مەن دامۋ تەجەلۋى بايقالادى. بۇل تۋرالى استاناداعى «قورعاۋ» داعدارىس ورتالىعىنىڭ باسشىسى اننا رىل مالىمدەدى.

у
Фото: Kazinform/ЖИ

ونىڭ ايتۋىنشا، تۇرمىستىق زورلىق- زومبىلىقتان قاشقان ايەلدەر كەيدە بالالارىن ەرتىپ، ۇيىنەن ەشقانداي زات الماستان كەتۋگە ءماجبۇر بولادى. مۇنداي جاعدايلاردا ولاردى داعدارىس ورتالىعىنا پوليتسيا قىزمەتكەرلەرى جەتكىزەدى.

اننا رىل ورتالىق تاجىريبەسىندە كەزدەسكەن بىرنەشە وقيعانى مىسالعا كەلتىردى. بىردە جۇكتى ايەلدى پانالاۋ ورنىنا تۇنگى كويلەگى مەن ءۇي تاپىشكەسىمەن الىپ كەلگەن. تاعى ءبىر جاعدايدا اناسى بالالارىن ەرتىپ، ماس كۇيدەگى اگرەسسوردان قورقىپ، ۇيىنەن قاشىپ شىققان. ولار سىرت كيىمدەرىن دە الىپ ۇلگەرمەگەن. كوشەدە قالعان وتباسىن پوليتسيا قىزمەتكەرلەرى بايقاپ، ورتالىققا جەتكىزگەن.

- بالا وتباسىنداعى جانجالعا كۋا بولادى. كوبىنە اناسىن قورعاۋعا تىرىسادى، سول كەزدە ءوزى دە فيزيكالىق زورلىق- زومبىلىققا ۇشىراۋى مۇمكىن. بالالىق شاقتاعى پسيحولوگيالىق جاراقات پەن قورقىنىش ادامنىڭ بۇكىل ومىرىنە اسەر ەتەدى. بۇل ونىڭ مىنەز-قۇلقىنان، بولاشاقتا جار تاڭداۋىنان، جالپى ومىرلىك جولىنان كورىنىس تابۋى مۇمكىن، - دەدى ورتالىق باسشىسى.

ونىڭ ايتۋىنشا، وتباسىنداعى تۇراقتى كۇيزەلىستى باستان وتكەرگەن كەيبىر بالالاردا تۇتىعۋ مەن دامۋ تەجەلۋى بايقالادى. سوندىقتان داعدارىس ورتالىعىندا كامەلەتكە تولماعاندارعا جەكە قولداۋ كورسەتۋگە ەرەكشە كوڭىل بولىنەدى.

- «قورعاۋ» ورتالىعىندا بالالارعا ارنالعان ارنايى توپتار جۇمىس ىستەيدى. ولارمەن پسيحولوگتار، تاربيەشىلەر جانە لوگوپەدتەر اينالىسادى. ماماندار بالالاردىڭ باسىنان وتكەرگەن قورقىنىشىن جەڭىلدەتۋگە، ءوزىن قاۋىپسىز سەزىنۋىنە جانە جاڭا ورتاعا بەيىمدەلۋىنە كومەكتەسەدى، - دەدى سپيكەر.

ايتا كەتەيىك، «قورعاۋ» داعدارىس ورتالىعى استانادا 2009 -جىلدان بەرى جۇمىس ىستەيدى. مۇندا تۇرمىستىق زورلىق-زومبىلىقتان زارداپ شەككەن ايەلدەر مەن ولاردىڭ بالالارىنا ۋاقىتشا باسپانا جانە قاجەتتى الەۋمەتتىك قولداۋ كورسەتىلەدى.

ەسكە سالايىق، بۇعان دەيىن استانادا پوليتسيا جاسىرىن زورلىق-زومبىلىق فاكتىلەرىن انىقتاۋ ءۇشىن ۇيلەردى ارالايتىنى حابارلاندى.