يپوتەكاسى بار ادام قايتىس بولعان جاعدايدا نە بولادى؟

استانا. قازاقپارات - يپوتەكاسى بار ادام قايتىس بولعان جاعدايدا نە بولادى؟ ماسساگەت ءتىلشىسى انىقتاپ كوردى.

ەڭ الدىمەن مۇراگەر بىردەن بورىشكەرگە اينالمايتىنىن ءتۇسىنۋ ماڭىزدى، ويتكەنى بۇعان زاڭدى نەگىزدىڭ بولۋى شارت. مۇراگەرلىك قۇقىق جاعدايىندا مۇنداي نەگىزگە مۇرانى قابىلداۋ جاتادى. سونىمەن قاتار مۇرانى قابىلداۋ كەزىندە قۇقىقتى تاڭداپ، مىندەتتەردەن باس تارتۋ مۇمكىن ەمەسىن ەستە ساقتاڭىز. مۇرا مۇراگەرگە جان-جاقتى جانە وزگەرىسسىز كۇيدە وتەدى.

ياعني ەگەر قايتىس بولعان ادامنىڭ يپوتەكاعا الىنعان پاتەرىن يەمدەنگىڭىز كەلسە، پاتەرگە قۇقىقپەن بىرگە يپوتەكانى دا وتەۋگە مىندەتتەلەسىز.

مۇراگەر مۇرا قالدىرۋشىنىڭ قارىزدارى بويىنشا جاۋاپ بەرۋى ءۇشىن بەلگىلى ءبىر شارتتار ورىندالۋى ءتيىس:

مۇراگەر مۇرانى مۇرا اشىلعان جەرگە ءوتىنىش نەمەسە مۇراگەردەن كۋالىك بەرۋ تۋرالى ءوتىنىش بەرۋ ارقىلى قابىلداۋى كەرەك. مۇراگەرلىك قۇقىعى تۋرالى كۋالىك مۇرا اشىلعان كۇننەن باستاپ 6 اي وتكەن سوڭ بەرىلەدى؛
مۇراگەر وسيەت نەگىزىندە مۇرادان ايىرىلماۋى كەرەك؛
مۇراگەر مۇرادان باس تارتپاۋى كەرەك؛
مۇراگەر قانداي دا ءبىر مۇلىكتى الۋى كەرەك.
مۇرا قالدىرۋشىنىڭ قارىزىن تولەمەۋ ءۇشىن مۇراگەر مۇرا اشىلعان كۇننەن باستاپ 6 اي ىشىندە مۇرادان باس تارتا الادى. مۇرادان باس تارتقىسى كەلەتىن ادام مۇرا اشىلعان جەردە نوتاريۋسقا جازباشا ءوتىنىش بەرۋى كەرەك.

مۇرانىڭ ءبىر بولىگىنەن باس تارتۋعا، ەسكەرتۋلەرمەن نەمەسە شارتپەن مۇرادان باس تارتۋعا جول بەرىلمەيدى.

ەگەر مۇراگەرلەر بولماسا نەمەسە ءبارى مۇرادان باس تارتسا، وندا مۇرا - يەسىز مۇلىك دەپ تانىلادى. ياعني مۇلىك مۇرا اشىلعان جەردە كوممۋنالدىق مەنشىككە وتەدى.