يپوتەكاسى بار ادام قايتىس بولعان جاعدايدا بانك الدىنداعى مىندەتتەمەلەر قالاي ورىندالادى؟
استانا. KAZINFORM - يپوتەكالىق قارىز رەسىمدەۋ كەزىندە كرەديت بەرۋ شارتتارىن عانا ەمەس، سونداي-اق قارىز الۋشى قايتىس بولعان جاعدايدا تۋىنداۋى مۇمكىن قۇقىقتىق سالداردى دا ءتۇسىنۋ ماڭىزدى.
قارجى نارىعىن رەتتەۋ جانە دامىتۋ اگەنتتىگى يپوتەكالىق قارىزدار بويىنشا مىندەتتەمەلەردى مۇراعا قابىلداۋ ءتارتىبىن، مۇراگەرلەردىڭ قۇقىقتارى مەن مىندەتتەرىن، سونداي-اق مۇنداي جاعدايلاردا بانك الدىنداعى مىندەتتەمەلەردى ورىنداۋ ەرەكشەلىكتەرىن ءتۇسىندىردى، - دەپ حابارلايدى Aikyn.kz.
ازاماتتىق كودەكسكە سايكەس مۇرانىڭ قۇرامىنا مۇرا قالدىرۋشىعا تيەسىلى مۇلىك، سونداي-اق مۇلىكتىك قۇقىقتار مەن مىندەتتەر كىرەدى. وسىعان بايلانىستى بانكتىك قارىز شارتى، ونىڭ ىشىندە يپوتەكا بويىنشا مىندەتتەمەلەر قارىز الۋشىنىڭ قايتىس بولۋىنا بايلانىستى توقتاتىلمايدى جانە كەپىلگە بەرىلگەن جىلجىمايتىن مۇلىكتى قوسا العاندا، مۇرا قابىلدانعاننان كەيىن مۇراعا قالاتىن مۇلىككە قاتىستى قۇقىقتارمەن ءبىر ۋاقىتتا مۇراگەرلەرگە وتەدى.
مۇراگەرلەردىڭ يپوتەكالىق كرەديت بويىنشا جاۋاپكەرشىلىگى
كرەديتورلار وسيەتتى ورىنداۋشىعا (مۇرانى سەنىمگەرلىكپەن باسقارۋشىعا) نە مۇراگەرلەرگە مۇرا قالدىرۋشىنىڭ مىندەتتەمەلەرىنەن تۋىندايتىن تالاپتاردى قويۋعا قۇقىلى. مۇرا قابىلدانعاننان كەيىن مۇراگەرلەر مۇرا قالدىرۋشىنىڭ قارىزدارى بويىنشا ورتاق بورىشكەرلەر رەتىندە جاۋاپ بەرەدى. بۇل رەتتە ءاربىر مۇراگەردىڭ جاۋاپكەرشىلىگى وعان مۇراگەرلىك تارتىبىمەن وتكەن مۇلىكتىڭ قۇنىمەن شەكتەلەدى.
قارىز الۋشى قايتىس بولعاننان كەيىن يپوتەكالىق كەپىلدى ساقتاۋ
قارىز الۋشىنىڭ قايتىس بولۋى يپوتەكانى توقتاتپايدى. يپوتەكالىق قارىز بويىنشا مىندەتتەمەلەر مۇرانىڭ قۇرامىنا كىرەتىندىكتەن جانە مۇراگەرلەرگە وتەتىندىكتەن كەپىل مۇلكى مۇراگەرلەرگە مۇراگەرلىك تارتىبىمەن وتكەن قۇقىقتار مەن مىندەتتەر كولەمى شەگىندە قارىز بويىنشا مىندەتتەمەلەر تولىق ورىندالعانعا دەيىن ساقتالادى.
كرەديتورلار ءوز قۇقىقتارىن قورعاۋدىڭ زاڭنامادا كوزدەلگەن تاسىلدەرىن ىسكە اسىرۋعا قۇقىلى. اتاپ ايتقاندا، مۇراگەرلەر مۇرانى قابىلداعان، ءبىراق مۇلىكتى نە مۇرانىڭ قۇرامىنا كىرەتىن مۇلىككە قۇقىقتاردى تىركەۋدەن جالتاراتىن جاعدايلاردا، كرەديتورلار مۇنداي تىركەۋدى ماجبۇرلەۋ تارتىبىمەن جۇزەگە اسىرۋدى تالاپ ەتۋگە قۇقىلى.
كەپىل مۇلكىن ءوندىرىپ الۋ ماسەلەلەرى زاڭناماعا، بانكتىك قارىز شارتىنىڭ جانە يپوتەكا شارتىنىڭ تالاپتارىنا سايكەس ءاربىر جاعدايدىڭ ناقتى ءمان-جايلارىن ەسكەرە وتىرىپ شەشىلەدى.
ەگەر مۇراگەرلەر بولماسا نەمەسە مۇرادان باس تارتسا نە ىستەۋ كەرەك؟
وسيەت بويىنشا دا، زاڭ بويىنشا دا مۇراگەرلەر بولماعان جاعدايلاردا مۇراگەرلەردىڭ ەشقايسىسى مۇراگەرلىك ەتۋگە قۇقىعى جوق نە بارلىق مۇراگەرلەر مۇرادان باس تارتسا، مۇرا يەسىز قالعان مۇلىك دەپ تانىلادى.
مۇنداي مۇلىك زاڭنامادا بەلگىلەنگەن تارتىپپەن مۇرا اشىلعان جەر بويىنشا كوممۋنالدىق مەنشىككە وتەدى.
بۇل رەتتە، مۇلىكتىڭ كوممۋنالدىق مەنشىككە اۋىسۋى مۇرا قالدىرۋشىنىڭ كرەديتورلار الدىنداعى مىندەتتەمەلەرىن توقتاتپايدى جانە ولاردى زاڭنامادا كوزدەلگەن تارتىپپەن جانە شەكتە تالاپتار قويۋ قۇقىعىنان ايىرمايدى.
مۇراعا كىرگەننەن كەيىن يپوتەكالىق كرەديتتى رەتتەۋ مەرزىمدەرى
مۇرانى قابىلداۋ ءۇشىن جالپى مەرزىم مۇرا اشىلعان كۇننەن باستاپ التى ايدى قۇرايدى. مۇراگەرلىك قۇقىقتاردى رەسىمدەۋ كەزەڭىندە بانك مۇراگەرلەردىڭ شەڭبەرىن ايقىنداۋ جانە ولاردىڭ مۇراعا كىرۋ ساتىنە دەيىن سىياقىنى، تۇراقسىزدىق ايىبىن (ايىپپۇلداردى، ءوسىمپۇلداردى) جانە مىندەتتەمەلەردى ورىنداۋ مەرزىمىن وتكىزىپ الۋعا بايلانىستى وزگە دە تولەمدەردى ەسەپتەۋدى توقتاتا تۇرۋ تۋرالى ماسەلەنى قاراۋعا تيىس.
مۇرا قابىلدانعاننان كەيىن يپوتەكالىق قارىز بويىنشا مىندەتتەمەلەردى ودان ءارى ورىنداۋ بانكتىك قارىز شارتىنىڭ تالاپتارىنا، تولەمدەر كەستەسىنە جانە يپوتەكا شارتىنا سايكەس جۇزەگە اسىرىلادى.
بانك يپوتەكانى مەرزىمىنەن بۇرىن وتەۋدى تالاپ ەتە الا ما؟
يپوتەكالىق قارىزدى مەرزىمىنەن بۇرىن وتەۋ تۋرالى تالاپ زاڭنامادا جانە بانكتىك قارىز شارتىنىڭ تالاپتارىندا كوزدەلگەن جاعدايلاردا عانا قويىلۋى مۇمكىن.
قارىز الۋشىنىڭ قايتىس بولۋ فاكتىسىنىڭ ءوزى بانككە يپوتەكالىق كرەديت بويىنشا مىندەتتەمەلەردى مەرزىمىنەن بۇرىن ورىنداۋدى تالاپ ەتۋگە شارتسىز قۇقىق بەرمەيدى. بۇل رەتتە مۇراگەرلەر بورىشكەردىڭ كەپىل مۇلكىنە قۇقىقتى قابىلداعان جاعدايدا قارىز الۋشىنىڭ قايتىس بولۋى مىندەتتەمەنى توقتاتۋ ءۇشىن نەگىز بولىپ تابىلمايدى.
قوسا قارىز الۋشىلار مەن كەپىلگەرلەردىڭ مىندەتتەمەلەرى
ەگەر يپوتەكالىق قارىز بويىنشا قوسا قارىز الۋشىلار بولسا، ولاردىڭ مىندەتتەمەلەرى بانكتىك قارىز شارتىندا كوزدەلگەن كولەمدە ساقتالادى. ەگەر زاڭنامادا نەمەسە شارتتا وزگەشە كوزدەلمەسە، كەپىلدىك جانە كەپىلگەرلىك ولار قامتاماسىز ەتكەن مىندەتتەمەنىڭ توقتاتىلۋىمەن، سونداي-اق زاڭنامادا كوزدەلگەن وزگە دە جاعدايلاردا توقتاتىلادى.
وسىلايشا، قارىز الۋشىنىڭ قايتىس بولۋى يپوتەكالىق قارىز بويىنشا مىندەتتەمەلەردى اۆتوماتتى تۇردە توقتاتۋعا الىپ كەلمەيدى. مۇنداي مىندەتتەمەلەر بويىنشا قۇقىقتار مەن مىندەتتەر ازاماتتىق زاڭداردا بەلگىلەنگەن تارتىپپەن مۇراگەرلەرگە وتەدى، ال مىندەتتەمەلەردى ودان ءارى ورىنداۋ جاسالعان شارتتاردىڭ تالاپتارى مەن ءاربىر جاعدايدىڭ ناقتى ءمان- جايلارى ەسكەرىلە وتىرىپ جۇزەگە اسىرىلادى.
