09:15, 24 - قاراشا 2024 | GMT +5
يوردانياداعى يزرايل ەلشىلىگى اۋماعىندا اتىس بولدى – ب ا ق
استانا. KAZINFORM - يوردانيا استاناسى اممانداعى يزرايل ەلشىلىگى اۋماعىندا اتىس بولدى. بۇل تۋرالى Reuters جەرگىلىكتى پوليتسياعا سىلتەمە جاساپ حابارلادى.
«يوردانيا پوليتسياسى يزرايل ەلشىلىگى ورنالاسقان اۋماقتى قورشاۋعا العاننان كەيىن اتىس ەستىلگەن»، - دەلىنگەن اگەنتتىك حابارلاماسىندا.
كۋاگەردىڭ سوزىنە قاراعاندا جەرگىلىكتى پوليتسەيلەر اۋماقتى قورشاعان، اتالعان اۋماقتا قاۋىپسىزدىك شارالارى كۇشەيتىلگەن.
الدىن الا مالىمەت بويىنشا، قارۋلانعان ادام كوز جۇمعان، بۇدان بولەك 3 پوليتسەي اتىستان جارالانعان.
ەسكە سالساق، بۇعان دەيىن حابارلاعانىمىزداي يوردانيا سوتى ەل پارلامەنتىنىڭ بۇرىنعى دەپۋتاتى يماد ءال-ادۋاندى 10 جىلعا سوتتادى. وعان يوردان وزەنىنىڭ باتىس جاعالاۋىنا كونتراباندالىق جولمەن قارۋ تاسىمالداعان دەگەن ايىپ تاعىلدى.
