يود جەتىسپەسە، اعزادا قانداي وزگەرىستەر بولادى

سانيتاريالىق- ەپيدەميولوگيالىق باقىلاۋ كوميتەتىنىڭ باسپا ءسوز قىزمەتى مالىمەتىنشە، يود - قالقانشا بەزىنىڭ قالىپتى جۇمىس ىستەۋىنە، ونىڭ گورموندارىنىڭ تۇزىلۋىنە، سونداي-اق اعزانىڭ ءوسۋى مەن دامۋىنا قاجەتتى ومىرلىك ماڭىزى بار ميكروەلەمەنت.

- يودتىڭ اعزاعا جەتكىلىكتى مولشەردە ءتۇسۋى اسىرەسە جۇكتىلىك، بالالىق جانە جاسوسپىرىمدىك كەزەڭدەردە اسا ماڭىزدى. يود تاپشىلىعى قالقانشا بەزىنىڭ قىزمەتىنىڭ بۇزىلۋىنا اكەلۋى، بالالاردىڭ دەنە جانە اقىل-وي دامۋىنا كەرى اسەر ەتۋى، سونداي-اق ەڭبەككە قابىلەتتىلىكتىڭ تومەندەۋىنە جانە تەز شارشاعىشتىققا سەبەپ بولۋى مۇمكىن،- دەلىنگەن كوميتەت تاراتقان اقپاراتتا.

اعزانى يودپەن جەتكىلىكتى مولشەردە قامتاماسىز ەتۋ ءۇشىن تومەندەگى قاراپايىم ۇسىنىمداردى ۇستانۋ ماڭىزدى:

1. يودتالعان تۇزدى تاڭداڭىز. كادىمگى تۇزدىڭ ورنىنا يودتالعان تۇزدى پايدالانىڭىز. يودتىڭ جىلۋمەن وڭدەۋ كەزىندە جوعالۋىن ازايتۋ ءۇشىن ونى دايىن تاعامعا نەمەسە تاعام ازىرلەۋدىڭ سوڭىندا قوسقان ءجون.

2. تاماق تانۋ راتسيونىن تۇرلەندىرىڭىز. يودتىڭ تابيعي كوزدەرى بولىپ تابىلاتىن تەڭىز بالىعى مەن تەڭىز ونىمدەرىن، ءسۇت جانە ءسۇت ونىمدەرىن ۇنەمى تۇتىنىڭىز.

3. بالالار مەن جۇكتى ايەلدەردىڭ تاماقتانۋىنا ەرەكشە كوڭىل ءبولىڭىز. يودتىڭ جەتكىلىكتى مولشەردە ءتۇسۋى بالانىڭ جۇيكە جۇيەسىنىڭ قالىپتاسۋى مەن دامۋى ءۇشىن اسا ماڭىزدى.

4. يودتالعان تۇزدى دۇرىس ساقتاڭىز. ونى قاقپاعى تىعىز جابىلاتىن ىدىستا نەمەسە قاپتامادا، قۇرعاق ءارى سالقىن جەردە ساقتاڭىز.

سونىمەن قاتار، يودتالعان تۇزدى پايدالانۋ تۇز مولشەرىن كوبەيتۋ قاجەت دەگەندى بىلدىرمەيتىنىن ەستە ۇستاعان ءجون. تۇز تۇتىنۋدى شەكتەۋ جونىندەگى ۇسىنىمداردى ساقتاۋ قاجەت.

جۇكتى جانە بالا ەمىزەتىن ايەلدەرگە، سونداي-اق قالقانشا بەزىنىڭ اۋرۋلارى بار ادامدارعا يودتى قوسىمشا قابىلداۋ قاجەت بولعان جاعدايدا دارىگەرمەن كەڭەسۋ ۇسىنىلادى.