ۆيتسە-پرەزيدەنت قازاقستان حالىق كەڭەسىنىڭ العاشقى سەسسياسىندا پرەزيدەنت ايتقان باستامالاردى ىسكە اسىرۋ ماسەلەلەرى بويىنشا كەڭەس وتكىزدى

اقوردادا ۆيتسە-پرەزيدەنت ەرلان قاريننىڭ توراعالىعىمەن ەتنوسارالىق كەلىسىمدى ودان ءارى نىعايتۋ، سونداي-اق مەملەكەت باسشىسى قاسىم-جومارت توقايەۆتىڭ قازاقستان حالىق كەڭەسىنىڭ العاشقى سەسسياسىندا ايتقان باستامالارى مەن تاپسىرمالارىن ىسكە اسىرۋ ماسەلەلەرىنە ارنالعان رەسپۋبليكالىق جۇمىس كەڭەسى ءوتتى.

جيىنعا باس پروكۋراتۋرانىڭ، پرەزيدەنت اكىمشىلىگى قۇرىلىمدىق بولىمشەلەرىنىڭ، قازاقستان حالىق كەڭەسى حاتشىلىعىنىڭ، سىرتقى ىستەر، ىشكى ىستەر، ادىلەت، مادەنيەت جانە اقپارات، وقۋ-اعارتۋ، عىلىم جانە جوعارى ءبىلىم مينيسترلىكتەرىنىڭ باسشىلارى قاتىستى.

ەڭ الدىمەن، جيىندا مەملەكەت باسشىسىنىڭ قازاقستان حالىق كەڭەسىنىڭ ءبىرىنشى سەسسياسىنىڭ اشىلۋىندا جۇكتەگەن مىندەتتەرىن ورىنداۋ ماسەلەلەرى قارالدى. ەرلان قارين قوعامدا پرەزيدەنتتىڭ نەگىزگى ۇستانىمدارىن ىلگەرىلەتۋ بويىنشا اقپاراتتىق-ءتۇسىندىرۋ جۇمىستارىن جالعاستىرۋدى تاپسىردى، سونداي-اق مەملەكەت باسشىسىنىڭ تاپسىرمالارىن ىسكە اسىرۋ بارىسىن ايرىقشا باقىلاۋعا الۋ قاجەت ەكەنىنە نازار اۋداردى.

- كونستيتۋتسيادا ايقىندالعان قۇندىلىقتار پرەزيدەنت قاسىم-جومارت توقايەۆتىڭ ساياسي باعدارىنىڭ ماعىنالىق وزەگىن قۇرايدى جانە قوعامدىق تۇتاستىقتى نىعايتۋدىڭ بەرىك نەگىزىن قالىپتاستىرادى. وسى تۇرعىدا ەتنوسارالىق جانە كونفەسسياارالىق كەلىسىمنىڭ كونستيتۋتسيالىق قۇندىلىق رەتىندە ماڭىزى ايرىقشا. بۇلار - مەملەكەتتىڭ تۇراقتى دامۋىنىڭ نەگىزى. سوندىقتان اتالعان قۇندىلىقتاردى قوعامدىق سانادا ورنىقتىرىپ، كەڭىنەن ناسيحاتتاۋ ماقساتىندا جۇيەلى ءارى تۇراقتى جۇمىس جۇرگىزىلۋى قاجەت، - دەدى ەرلان قارين.

سونداي-اق ۆيتسە-پرەزيدەنت قازاقستان حالىق كەڭەسىنىڭ حاتشىلىعى ازاماتتاردىڭ ەتنوسارالىق كەلىسىم، قوعامدىق ديالوگ جانە وڭىرلەردى دامىتۋ ماسەلەلەرىنە قاتىستى سۇرانىستارىن جيناقتاپ، ولاردى توپتاستىراتىن ورنىقتى قوعامدىق الاڭ قالىپتاستىرۋ باعىتىندا جۇيەلى جۇمىس باستالعانىن اتاپ ءوتتى.

- پرەزيدەنت قازاقستان حالقى اسسامبلەياسى مەن ۇلتتىق قۇرىلتايدىڭ ساباقتاستىعىن، ءداستۇرى مەن وزىق تاجىريبەسىن ساقتاۋ تۋرالى ناقتى مىندەت جۇكتەدى. قازاقستان حالىق كەڭەسىنىڭ حاتشىلىعى بۇل باعىتتاعى ۇيىمداستىرۋشىلىق جۇمىستى جەتىلدىرۋدە نەگىزگى ءرول اتقارادى، - دەدى ەرلان قارين.

بۇدان كەيىن جيىندا ەتنوسارالىق جانە كونفەسسياارالىق كەلىسىمدى كونستيتۋتسيالىق قۇندىلىق رەتىندە ورنىقتىرۋ ماسەلەسى قارالدى.

ەرلان قارين جاڭا كونستيتۋتسيا قابىلدانىپ، نەگىزگى بيلىك ينستيتۋتتارىنىڭ قالىپتاسۋىنا بايلانىستى زاماناۋي ءارى سەرپىندى مەملەكەتتىك- ساياسي مودەلگە كوشۋ ۇدەرىسى جۇزەگە اسقانىن اتاپ ءوتتى. ونىڭ ايتۋىنشا، ىشكى ساياساتتاعى ماڭىزدى باعىتتاردىڭ ءبىرى - قوعامدا كونستيتۋتسيادا بەكىتىلگەن مەملەكەتتىك قاعيداتتار مەن جالپىۇلتتىق قۇندىلىقتاردى ورنىقتىرۋ. ونىڭ ىشىندە زاڭ جانە ءتارتىپ ۇستەمدىگىن قامتاماسىز ەتۋ، ۇلت بىرلىگىن نىعايتۋ ايرىقشا ماڭىزعا يە.

- مەملەكەت باسشىسى اتاپ وتكەندەي، ەلىمىزدە تىلىنە، ۇلتىنا، دىني كوزقاراسى مەن نانىم-سەنىمىنە قاراي نەمەسە وزگە دە سەبەپتەرگە بايلانىستى كەمسىتۋگە بولمايدى. سوندىقتان قوعامنىڭ بىرلىگىنە نۇقسان كەلتىرەتىن كەز كەلگەن ارەكەتكە مەملەكەت «زاڭ جانە ءتارتىپ» قاعيداتى اياسىندا قاتاڭ توسقاۋىل قويادى. قوعام دا جاۋاپكەرشىلىك پەن پاراساتتىلىق تانىتۋى كەرەك. ءتىل، ەتنوسارالىق قاتىناستار، ءدىن سياقتى سەزىمتال ماسەلەلەر توڭىرەگىندە شامادان تىس ەموتسياعا بەرىلىپ، پىكىر تالاستىرۋ قوعام بىرلىگىنىڭ يدەولوگيالىق نەگىزدەرىنە بەلگىلى ءبىر دەڭگەيدە زاردابىن تيگىزۋى مۇمكىن ەكەنىن تۇسىنگەنى ابزال، - دەدى ەرلان قارين.

سونىمەن قاتار كەڭەس بارىسىندا «زاڭ جانە ءتارتىپ» قاعيداتىن، «تازا قازاقستان» جوباسىن، «ادال ازامات» تاربيە باعدارلاماسىن جۇيەلى ءارى ناقتى ىسكە اسىرۋ ماسەلەلەرىنە نازار اۋدارىلدى. ەرلان قاريننىڭ ايتۋىنشا، پرەزيدەنتتىڭ اتالعان باستامالارىنىڭ ءمان-ماڭىزى ءبىر-بىرىمەن بايلانىستى ءارى جاڭا قوعامدىق ەتيكانى قالىپتاستىرۋعا باعىتتالعان ءوزارا ساباقتاس دۇنيەلەر.

- بۇگىندە ەلىمىزدە جالپىۇلتتىق كۇن تارتىبىندەگى نەگىزگى ماسەلەلەر بويىنشا ورنىقتى قوعامدىق كونسەنسۋس قالىپتاسقان. ال قوعامدا ارا-تۇرا بولىپ تۇراتىن ءتۇرلى رەزونانستى جاعدايلار كوبىنە جەكەلەگەن ازاماتتاردىڭ قاراپايىم ادەپ نورمالارىن ساقتاماۋىنان ءارى وزگەلەرگە قۇرمەتتىڭ جوقتىعىنان تۋىندايدى. سوندىقتان قازىرگى تاڭدا جاڭا قوعامدىق ەتيكانى قالىپتاستىرۋ جانە ىلگەرىلەتۋ اسا ماڭىزدى، - دەدى ۆيتسە-پرەزيدەنت.

ەرلان قارين بۇل باعىتتاعى جۇمىستىڭ تيىمدىلىگى مەملەكەتتىك ورگاندار قىزمەتىن تۇراقتى ۇيلەستىرۋدى جانە قوعامدىق ينستيتۋتتارمەن ءوزارا جۇيەلى ءىس-قيمىلدى تالاپ ەتەتىنىن ەسكە سالدى.

ۆيتسە-پرەزيدەنت كەڭەس قورىتىندىسى بويىنشا مەملەكەتتىك ورگاندارعا ءوزارا ءىس-قيمىلدىڭ الدەقايدا ءتيىمدى تەتىگىن قالىپتاستىرۋ جانە ەتنوسارالىق كەلىسىمدى ودان ءارى نىعايتۋ ءۇشىن جۇمىس تاسىلدەرىن جەتىلدىرۋدى تاپسىردى.