ۆيتسە-پرەمەر قۋاڭشىلىق بولۋى مۇمكىن وڭىرلەردى اتادى
استانا. KAZINFORM - پرەمەر-ءمينيستردىڭ ورىنباسارى سەرىك جۇمانعارين ءماجىلىستىڭ جالپى وتىرىسىنان كەيىن بولعان بريفينگىدە قۋاڭشىلىق بولۋى مۇمكىن وڭىرلەردى اتادى

«قازگيدرومەت» بولجامدارىن ءسال جاڭارتقانىن بىلەسىزدەر. بيىل قۋاڭشىلىق قوستاناي وبلىسىنىڭ امانگەلدى، جانگەلدين اۋداندارىندا بولۋى مۇمكىن. مەن ول ەكى اۋداندى ارالاپ ءوتتىم. جانگەلدين اۋدان قوستاناي وبلىسىنىڭ ەڭ وڭتۇستىگىندەگى ولكە. ول جاقتا ەگىن ەگۋ بويىنشا ەشقانداي قاتەر جوق. ويتكەنى امانگەلدى اۋدانىندا دا، جانگەلدى اۋدانىندا دا ەشكىم ۇلكەن كولەمدە ەگىن ەكپەيدى. حالىقتىڭ نەگىزگى بولىگى مال شارۋاشىلىعىمەن اينالىسادى. قوستاناي وبلىسىنداعى ديقانداردىڭ نەگىزگى ءماسسيۆى ارقالىقتان سولتۇستىكتە جاتىر. سوندىقتان «قازگيدرومەتتىڭ» دەرەگى بويىنشا ەشقانداي قاۋىپ جوق. سولتۇستىك قازاقستان، اقمولا وبلىستارىندا دا سولاي. بەينەلەپ ايتساق، استىقتىڭ 90 پايىزىن بەرەتىن وڭىرلەر عوي»، - دەدى ول.
س. جۇمانعارين اقتوبە وبلىسىندا دا قۋاڭشىلىق بولۋى مۇمكىن ەكەنىن ايتتى.
«بالكىم اقتوبە وبلىسىنىڭ قارعالى، مۇعالجار اۋداندارىندا پروبلەما بار شىعار. وسى اۋدانداردا قۋاڭشىلىق بولۋى مۇمكىن دەلىنىپ وتىر. قارعالى اۋدانى اقتوبە وبلىسىنداعى ەگىن شىعىمىنا اسەر ەتۋى مۇمكىن. ءبىراق مۇعالجار اۋدانى ەمەس. ول دا مالدى اۋىل»، - دەدى ۆيتسە- پرەمەر.