ۆيتسە-مينيستر «وزبەكستاندا نان قازاقستانعا قاراعاندا نەگە ارزان» دەگەن سۇراققا جاۋاپ بەردى
ساۋدا جانە ينتەگراتسيا ۆيتسە-ءمينيسترى قايرات تورەبايەۆ تىلشىلەردىڭ «قازاقستانعا قاراعاندا وزبەكستاندا نان نە سەبەپتى ارزان؟» دەگەن سۇراعىنا جاۋاپ بەردى، دەپ حابارلايدى Kazinform.
«ءبىز ەلىمىزدە بيداي ءوسىرىپ، اۋقىمدى كولەمدە ۇن ءوندىرىپ وتىرمىز. سونىمەن قاتار وسى ۇندى وزبەكستانعا جەتكىزىپ جاتىرمىز. ءبىراق كورشى ەلدە نان بىزگە قاراعاندا ارزان»، - دەدى جۋرناليستەر.
ءوز كەزەگىندە قايرات تورەبايەۆ ءار كاسىپورىندا ءوزىنىڭ ەكونوميكالىق نەگىزدەمەسى بار ەكەنىن ايتتى.
«ءبىز قانداي دا ءبىر ءونىمدى شىعارعان كەزدە، ەل ىشىندەگى بارلىق شىعىندار ەسكەرىلەدى. وسى رەتتە ەلەكتر ەنەرگياسى، سالىقتار قامتىلادى. سوندىقتان بۇل سۇراق بويىنشا وزبەكستان جانە قازاقستان ناۋبايحانالارى قانداي شىعىنعا تاپ بولىپ جاتقانىن ناقتى قاراۋ كەرەك.
ەكىنشىدەن، ناقتى ءبىر ءونىمدى تەڭ دارەجەدە بىردەي سالىستىرعان ءجون. ياعني قازاقستانداعى ناننىڭ وزبەكستانداعى ونىمگە قاراعاندا ساپاسى جاعىنان بىردەي مە؟ سوندىقتان، بۇل سۇراق كۇردەلى»، - دەدى ۆيتسە-مينيستر سەناتتىڭ جالپى وتىرىسىنان كەيىنگى باسپا ءسوز ءماسليحاتىندا.
بۇل تۇرعىدا مينيسترلىك وكىلى اتالعان ماسەلە بويىنشا ەندى ءتيىستى زەرتتەۋ جاساپ، ناقتى ستاتيستيكانى شىعارۋ كەرەك ەكەنىن ايتتى.
