ۆيتسە-مينيستر ءبىلىم گرانتتارىن ساتۋ جونىندەگى جارنامالارعا پىكىر ايتتى
استانا. KAZINFORM — ق ر عىلىم جانە جوعارى ءبىلىم ۆيتسە-ءمينيسترى دارحان احمەد-زاكي بلوگەرلەردىڭ اقىلى نەگىزدەگى ساپاسىز ءبىلىم بەرۋ كۋرستارىنا قاتىستى پىكىر ايتتى.

بۇگىن سەناتتىڭ جالپى وتىرىسىنان كەيىنگى باسپا ءسوز ءماسليحاتىندا تىلشىلەر ۋنيۆەرسيتەتتەر گرانتتارىن ساتۋ جارنامالارىنا قاتىستى سۇراق قويدى. بۇل تۇرعىدا كەيبىر ستۋدەنتتەر ءوز شاعىمدارىن الەۋمەتتىك جەلىلەردە جاريالاعان.
— ەگەر ناقتى فاكتىلەر بولسا، تەكسەرۋگە دايىنبىز. عالامتور كەڭىستىگىندە ءارتۇرلى جارنامالار بار، ولاردىڭ كوپشىلىگى جالعان بولۋى مۇمكىن جانە بۇل مۇقيات تەكسەرۋدى قاجەت ەتەدى، — دەدى د. احمەد-زاكي.
ۆيتسە-مينيستر گرانت ءبولۋ جۇيەسى قاتاڭ تۇردە ۇلتتىق ءبىرىڭعاي تەستىلەۋ (ۇ ب ت) قورىتىندىسىنان كەيىن جۇزەگە اسىرىلاتىنىن باسا ايتتى.
— قازىر سىناق ۇ ب ت- نىڭ ءبىرىنشى كەزەڭى باستالدى، كەلەسىسى كوكتەمدە، ال سوڭعى كەزەڭى ماۋسىم ايىندا بولادى. العان ۇپايلاردىڭ قورىتىندىسى بويىنشا گرانتتاردى ءبولۋ جونىندەگى كوميسسيانىڭ وتىرىسى تامىز ايىندا وتەدى، — دەدى ۆيتسە-مينيستر.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت، ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.
زاڭ اياسىندا حالىقارالىق عىلىمي جوبالار مەن وليمپيادالاردىڭ جەڭىمپازدارىنا جوعارى وقۋ ورىندارىنا گرانتتار بەرۋ جانە «بولاشاق» باعدارلاماسى اياسىندا باكالاۆرياتقا ءتۇسۋ مۇمكىندىگى ەنگىزىلەدى.