يتبالىقتار ناقتى قاداعالاۋدىڭ جوقتىعىنان قىرىلىپ جاتىر - ەكولوگ

اقتاۋ. KAZINFORM - كاسپي تەڭىزىندە قىرىلعان يتبالىقتاردىڭ سانى ەكى جۇزگە جۋىقتادى. يتبالىقتىڭ ءولىمى بويىنشا زەرتتەۋ ناتيجەسى ءالى جاريالانعان جوق. وسى ورايدا بەلگىلى ەكولوگ ادىلبەك قوزىباقوۆ پىكىر ءبىلدىردى.

ەكولوگيا جانە تابيعي رەسۋرستار مينيسترلىگى قوعامدىق كەڭەسىنىڭ جانە ECOJER قاۋىمداستىعى ماڭعىستاۋ وبلىسى بويىنشا ايماقتىق ەكولوگيالىق كەڭەسىنىڭ مۇشەسى ادىلبەك قوزىباقوۆتىڭ سوزىنشە، تەڭىزدە قىرىلعان جانۋارلاردىڭ سانى ولاردىڭ جالپى كولەمىنە شاققاندا قالىپتى قۇبىلىس.

«يتبالىقتاردىڭ قىرىلۋى جىلدا تىركەلەدى. جالپى، تىرشىلىك بولعاننان كەيىن ءولىم قاتار جۇرەدى. ول تەك يتبالىققا عانا ەمەس، باسقا جانۋارلارعا قاتىستى بولادى. جانۋاردىڭ سانى كوبەيگەن سايىن سالىستىرمالى تۇردە ءولىمى دە كوپ. 100 مىڭ يتبالىقتىڭ 1 پايىزى - 1 مىڭ. بۇل - قالىپتى جاعداي. سوندىقتان وتكەن ايدا قىرىلعان 179 يتبالىق كوپ ەمەس. ماسەلە مىنادا، بۇل ناقتى قاداعالاۋدىڭ، مونيتورينگتىڭ جوقتىعىنان بولىپ وتىر»، - دەدى ەكولوگ.

ادىلبەك قوزىباقوۆتىڭ ايتۋىنشا، يتبالىقتاردىڭ ءولىمىنىڭ سەبەبىن انىقتاۋدا كوپ جاعدايدا تاۋەلسىز ەكولوگتاردىڭ كومەگىنە جۇگىنە بەرمەيدى.

«تاۋەلسىز ساراپشىلار ارنايى ءبىلىمى بار مامانداردى مونيتورينگ جۇمىسىنا تارتاتىن بولسا، وندا كوپتەگەن اقپارات ۋاقىتىندا دەر كەزىندە جەتەدى. الەۋمەتتىك جەلىلەرى ارقىلى بولسىن جاريالانۋى ءتيىس. ءبىراق ونداي جاعداي بولماعاندىقتان ارينە، اركىم ءار ءتۇرلى وي- پىكىرىن ايتادى. بولجام جاساپ، كەرى باعىتقا قاراي تارتا بەرەدى. مىسالى، «اۋىرعان شىعار، ءبىر تۇستا مۇناي توگىلگەن بولۋى مۇمكىن» دەگەن تۇسپالداردى ادامدار الەۋمەتتىك جەلىدە ءبولىسىپ جاتادى. ولارعا بۇلاي جازبا دەپ ايتا الماسىڭ. سەبەبى، وعان قارسى ناقتى اقپارات جوق. بۇندايدى بولدىرماۋ ءۇشىن تاۋەلسىز ساراپشىلاردى مىندەتتى تۇردە تارتۋ كەرەك. ءبىراق بۇل جەردە دە كەدەرگىلەر بار. مىسالى، كاسىپكەرلىك كودەكسىندە تاۋەلسىز ساراپشى رەتىندە بيۋدجەتتەن قارجىلاندىرىلاتىن نەمەسە كۆازيمەملەكەتتىك كومپانيالاردان عانا تارتا الادى ەكەن. مىسالى، ەكولوگيا دەپارتامەنتى مەن پروكۋراتۋرا جاعى سولاردى عانا شاقىرا الادى. ەگەر ولار بيۋدجەتكە قاراستى مامان بولسا ول قالاي تاۋەلسىز ساراپشى بولادى. بۇل رەتتە مەملەكەتتەن قارجى المايتىن مامان مونيتورينگ جۇمىسى كەزىندە ساراپشى بولۋى كەرەك دەپ ويلايمىن»، - دەدى ەكولوگ.

ءساۋىر ايىنىڭ باسىندا كاسپيي تەڭىزىنىڭ ءتۇپقاراعان اۋدانىنداعى جاعالاۋانىنا جۇزدەن استام يتبالىقتىڭ ولەكسەسى تابىلدى.

ال ايدىڭ سوڭىنان تامان تاعى دا سەكسەنگە جۋىق تەڭىز جانۋارىنىڭ ۇشاسى تابىلىپ، قىرىلعان يتبالىقتار سانى ەكى جۇزگە جۋىقتادى.