يتاليادا 500 مىڭ جۇمىسشى شەرۋگە شىقتى
استانا. KAZINFORM - ەڭ ءىرى كاسىپوداقتار جاريالاعان جالپى ەرەۋىل اياسىندا 500 مىڭعا جۋىق جۇمىسشى يتاليا قالالارىنىڭ الاڭدارىنا شەرۋگە شىقتى.
8 ساعاتتىق ەرەۋىل بارلىق نەگىزگى مەملەكەتتىك سەكتورلاردى قامتىدى، ونىڭ ىشىندە دەنساۋلىق ساقتاۋ، ءبىلىم بەرۋ، سونداي- اق مەملەكەتتىك ورگاندار مەن كومپانيالار بار. كولىك، اۋە جانە تەڭىز قاتىناسى قۇزىرلى ورگانداردىڭ بۇيرىعىنا سايكەس ءتورت ساعاتقا ءۇزىلدى، دەپ حابارلادى ت ا س س.
ANSA اگەنتتىگىنىڭ حابارلاۋىنشا، ەڭ ءىرى دەمونستراتسيا بولونيادا جالپى يتاليا ەڭبەك كونفەدەراتسياسىنىڭ (Cgil) باسشىسى ماۋريتسيو ءلاندينيدىڭ قاتىسۋىمەن ءوتتى. كاسىپوداقتاردىڭ مالىمەتىنشە، نارازىلىق اكتسياسىن ءارتۇرلى سالاداعى جۇمىسشىلاردىڭ 70 پايىزدان استامى قولداعان. كەيبىر كومپانيالار كۇنى بويى جۇمىس ىستەمەدى. ەل بويىنشا مىڭداعان ادام قاتىسقان 43 شەرۋ بولدى؛ تەك تۋريندە پوليتسيامەن قاقتىعىستار بولعان.
بۇكىل حالىقتىق ەرەۋىل، كاسىپوداقتاردىڭ پىكىرىنشە، جۇمىسشىلاردىڭ مۇددەسى ەسكەرىلمەيتىن بيۋدجەت جوباسىنىڭ بەكىتىلۋىنە نارازىلىق رەتىندە جاريالاندى. اتاپ ايتقاندا، دەنساۋلىق ساقتاۋ مەن ءبىلىم بەرۋ، سونداي- اق الەۋمەتتىك سالاعا جۇمسالاتىن قارجىنىڭ قىسقارتىلىپ جاتقانى العا تارتىلۋدا.
يتاليادا ساعاتىنا 9 ەۋرو بولاتىن ەڭ تومەنگى جالاقى شەگىن ورناتۋ ءۇشىن ۇزاق ۋاقىت بويى كۇرەس ءجۇرىپ جاتىر.
ەلدەگى الەۋمەتتىك جاعداي تۋرالى سوڭعى ەسەپتەرگە سايكەس، يتاليادا 5,7 ميلليون ادام ءابسوليۋتتى كەدەيلىكتە ءومىر سۇرەدى، ياعني دەرلىك ءاربىر ونىنشى ازامات دەگەن ءسوز. بالالى جاس وتباسىلار ەڭ وسال توپ بولىپ قالا بەرەدى. ءبىر قىزىعى، ەلدىڭ ەكونوميكالىق قوزعالتقىشى سانالاتىن يتاليانىڭ سولتۇستىك ايماقتارىندا سوڭعى توعىز جىلدا ءابسوليۋتتى كەدەيلىكتە ءومىر سۇرەتىن يتالياندىقتاردىڭ سانى ەكى ەسەگە وسكەن.
قوسا كەتەيىك، قازان ايىنىڭ ەكىنشى جارتىسىندا 20 جىل ىشىندە يتاليانىڭ العاشقى جالپىۇلتتىق ەرەۋىلىنە قاتىسۋ ءۇشىن ريم كوشەلەرىنە ونداعان مىڭ اۆتوجۇمىسشى شەرۋگە شىققان بولاتىن.
