يتاليا ەلشىسى قازاقستان تۋرالى كىتاپ جازىپ جاتىر
استانا. KAZINFORM - يتاليانىڭ قازاقستانداعى ەلشىسى ماركو البەرتي «Kazakhstan in 10 words» اتتى كىتاپ جازىپ، ونى باسپاعا دايىنداۋدا.
بۇل تۋرالى ديپلومات «Kazakh Tourism» كومپانيانىڭ باسشىسى قايرات ءسادۋاقاسوۆتىڭ «Born Bold.Travel Boldcast» اۆتورلىق پودكاستىندا ايتتى.
ەلشى ءوز ەڭبەگىندە جەكە تاجىريبەسى مەن قىزمەتى ارقىلى قازاقستاندى سيپاتتايدى. كىتاپ ەلىمىزدى جاڭا قىرىنان تانىستىرۋدى ماقسات ەتەدى جانە جاقىنىراق تانىسقىسى كەلەتىندەرگە قىزىقتى بولادى.
اۆتوردىڭ سوزىنشە، كىتاپ قازاقستاندى سيپاتتايتىن 10 باستى سوزگە نەگىزدەلەدى. بۇل تۋىندىنىڭ بىرەگەي ەرەكشەلىگى بولماق.
- بىرنەشە دوسىمنان قانداي سوزبەن ءوز ەلدەرىن سيپاتتايتىنىن سۇراپ، وسى يدەيا تۋىندادى. سودان كەيىن مەن وسى سوزدەرگە بايلانىستى ءوز تاجىريبەمدى سيپاتتاۋدى شەشتىم. بۇل - مەنىڭ كىتابىمنىڭ نەگىزگى كونتسەپتسياسى. مەن قازاقستاندى ىشىنەن كورسەتۋگە نيەتتىمىن. كىتاپ 50-60 بەتتەن تۇرادى. ول بەستسەللەر رەتىندە جوسپارلانعان جوق. مەن ونى قازاقستاندا جۇرگەن كەزىمىزدەگى ەستەلىكتەر رەتىندە جاسادىم. مەنىڭشە، ەگەر سىزدە ماڭىزدى تاجىريبە بولسا، ونىمەە ءبولىسۋ كەرەك. بۇل ادامزاتتىڭ دامۋىنا كومەكتەسەدى. مەن كىتاپتى مەنەن كەيىن كەلەتىن ادامدارعا قالدىرعىم كەلەدى. ولار مەنىڭ تاجىريبەمدى پايدالانىپ، ءبىز وسىندا جاساعان نارسەنى جاقسارتا الادى، - دەدى ەلشى.
ەلشى كىتاپتى 2 تىلدە جاريالاۋدى جوسپارلاپ وتىر. ونى تەك قازاقستاندىقتار عانا ەمەس، باسقا ەلدەردىڭ تۇرعىندارى دا وقي الادى.
