مىسىرعا ساياحاتتاۋ جەڭىلدەيدى: قازاقستان مەن مىسىر قانداي كەلىسىمگە كەلدى
استانا. قازاقپارات - مىسىر قازاقستاندىق تۋريستەردىڭ ەلگە كىرۋىنە قاتىستى قوسىمشا تالاپتاردى الىپ تاستاۋعا كەلىستى. ق ر سىرتقى ىستەر مينيسترلىگىنىڭ مالىمەتىنشە، بۇل شەشىم قازاقستان ازاماتتارىنىڭ مىسىرعا ساياحاتتاۋىن جەڭىلدەتۋگە باعىتتالعان.
مۇنداي كەلىسىمگە قازاقستاننىڭ سىرتقى ىستەر ءمينيسترى مۇحتار تىلەۋبەردىنىڭ مىسىرعا رەسمي ساپارى بارىسىندا قول جەتكىزىلدى. ول وسى ەلدىڭ سىرتقى ىستەر، حالىقارالىق ىنتىماقتاستىق جانە شەتەلدەگى مىسىرلىقتار ىستەرى جونىندەگى ءمينيسترى بادر ابدەلاتتيمەن كەلىسسوز جۇرگىزدى.
كەزدەسۋدىڭ ماڭىزدى ناتيجەلەرىنىڭ ءبىرى - قازاقستاندى مىسىرعا تۋريستىك ماقساتپەن باراتىن ازاماتتارىنا قوسىمشا تالاپتار قويىلعان ورتالىق ازيا مەملەكەتتەرىنىڭ تىزىمىنەن شىعارۋ تۋرالى كەلىسىم.
كەلىسسوزدەردىڭ ماڭىزدى ناتيجەلەرىنىڭ ءبىرى - قازاقستاندى ەلىمىزدىڭ ازاماتتارىنا مىسىرعا تۋريستىك ماقساتپەن كىرۋ كەزىندە قوسىمشا تالاپتار قويىلاتىن ورتالىق ازيا مەملەكەتتەرىنىڭ تىزىمىنەن شىعارۋ تۋرالى ۋاعدالاستىققا قول جەتكىزۋ. بۇل شەشىم قازاقستاندىق تۋريستەردىڭ مىسىرعا ساپارىن جەڭىلدەتۋگە جانە ەكى ەل اراسىنداعى تۋريستىك بايلانىستى دامىتۋعا باعىتتالعان، - دەپ مالىمدەدى مينيسترلىك.
قازىر قازاقستاندىق تۋريستەرگە قانداي تالاپتار قويىلادى؟
2025 -جىلعى 1-قازاننان باستاپ مىسىرعا باراتىن قازاقستان ازاماتتارى ءۇشىن جاڭا ۆيزالىق تالاپتار ەنگىزىلگەن بولاتىن.
وعان سايكەس، 21 جاسقا تولماعان قازاقستاندىقتار مىسىرعا اتا-اناسىنىڭ بىرەۋىنسىز بارا المايدى.
ال 21 جاسقا تولعان ازاماتتار شارم-ەش-شەيحكە 15 كۇننەن اسپايتىن تۋريستىك ساپارمەن بارسا، ۆيزانى اۋەجايعا كەلگەننەن كەيىن راسىمدەي الادى. الايدا بۇل مۇمكىندىك تەك شارم-ەش-شەيح ايماعىندا دەمالاتىن تۋريستەرگە ارنالعان.
كاير، حۋرگادا جانە مىسىردىڭ باسقا قالالارىنا بارۋدى جوسپارلاعان ازاماتتار ۆيزانى قازاقستانداعى مىسىر ەلشىلىگىنەن الدىن الا الۋعا مىندەتتى.
جاڭا كەلىسىم وسى قوسىمشا تالاپتاردى الىپ تاستاۋدى كوزدەيدى. دەگەنمەن وزگەرىستەردىڭ ناقتى قاشان كۇشىنە ەنەتىنى جانە تۋريستەر ءۇشىن قانداي ءتارتىپ قولدانىلاتىنى ازىرگە حابارلانعان جوق.
قىزمەتتىك پاسپورت يەلەرىنە ۆيزاسىز رەجيم ەنگىزىلەدى
كەلىسسوزدەر قورىتىندىسىندا ەكى ەلدىڭ سىرتقى ىستەر مينيسترلەرى 2006 -جىلعى 7-قاراشادا جاسالعان ۇكىمەتارالىق كەلىسىمگە وزگەرىستەر ەنگىزۋ تۋرالى حاتتاماعا قول قويدى.
قۇجاتقا سايكەس، بۇعان دەيىن ديپلوماتيالىق پاسپورت يەلەرىنە قاراستىرىلعان ۆيزاسىز رەجيم ەندى قازاقستان مەن مىسىردىڭ جارامدى قىزمەتتىك پاسپورتتارى بار ازاماتتارىنا دا قولدانىلادى.
كەزدەسۋ بارىسىندا تاراپتار ەكى ەل اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرىن دە تالقىلادى. اتاپ ايتقاندا، ءوزارا تاۋار اينالىمىن ارتتىرۋ، بىرلەسكەن ينۆەستيتسيالىق جوبالاردى جۇزەگە اسىرۋ جانە حالىقارالىق ۇيىمدار اياسىنداعى بايلانىستى نىعايتۋ مۇمكىندىكتەرى قاراستىرىلدى.
سونىمەن قاتار قازاقستان مەن مىسىر پارلامەنتتەرىندەگى دوستىق توپتارىنىڭ جۇمىسىن جانداندىرۋعا كەلىستى. مادەني- گۋمانيتارلىق ىنتىماقتاستىققا، ونىڭ ىشىندە الەمدىك جانە ءداستۇرلى دىندەر ليدەرلەرى سەزى اياسىنداعى ءوزارا بايلانىسقا دا نازار اۋدارىلدى.
كەلىسسوزدەر سوڭىندا مۇحتار تىلەۋبەردى مەن بادر ابدەلاتتي بىرلەسكەن مالىمدەمە جاساپ، ەكى ەل اراسىنداعى ارىپتەستىكتى ودان ءارى دامىتۋعا دايىن ەكەنىن جەتكىزدى.
el.kz
